Partia Demokratike e Kosovës ka shkëputur koalicionin qeverisës me Lëvizjen Vetëvendosje në nivelin lokal, në komunën e Podujevës.
Lajmin e ka bërë të ditur vetë PDK-ja me anë të një postimi në Facebook, ku thuhet se vendimi është marrë pas mbledhjes së Këshillit Drejtues të Partisë Demokratike të Kosovës.
”Pas prishjes së koalicionit ditë më parë në Komunën e Gjilanit, sot, PDK ka shkëputur koalicionin qeverisës me Lëvizjen Vetëvendosjen edhe në Komunën e Podujevës. Këto vendime vijnë pas mbledhjes së Këshillit Drejtues të Partisë Demokratike e Kosovës, ku u vendos që të shkëputet çdo lloj komunikimi zyrtar me kryeministrin Albin Kurtin dhe me presidenten Vjosa Osmani”, thuhet në njoftim.
Tutje, PDK-ja ka kritikuar partinë në pushtet për shkatërrim të të arriturave në Kosovë dhe për rrezikimin e kësaj të fundit.
‘Në mbledhjen e Këshillit Drejtues të PDK-së, të mbajtur më 3 korrik, pasi është diskutuar gjatë për situatën në vend dhe sanksionet që tashmë po i vuajnë shteti dhe qytetarët tanë, ishte dakordim i përgjithshëm se Kryeministri Kurti dhe Lëvizja Vetëvendosje janë duke shkatërruar çdo të arritur në Kosovë të këtyre dy dekadave dhe janë duke e dërguar vendin drejt konfrontimit me aleatët që kanë qenë mbështetësit kryesor të lirisë dhe shtetësisë së Kosovës, duke e rrezikuar të ardhmen e shtetit të Kosovës”, thuhet në njoftim.
PDK-ja ka falënderuar përkrahësit e saj.