Shefi i Grupit Parlamentar të Partisë Demokratike të Kosovës (PDK), Abelard Tahiri, ka paralajmëruar se partia e tij do ta dërgojë në Gjykatën Kushtetuese Ligjin për Këshillin Prokurorial (KPK) dhe atë të Komisionit të Pavarur të Mediave (KPM).
Tahiri ka thënë se përmes votimit të këtyre ligjeve po tentohet të kapen dhe të nënshtrohen institucionet e pavarura si KPK e KPM.
“Përpjekjet e përsëritura të këtij pushteti për kapjen dhe nënshtrimin e institucioneve të pavarura të drejtësisë, si dhe kontrollimin e mediave dhe të fjalës së lirë, e morën formën e vendimit me miratimin e dy ligjeve në seancën e sotme. Prandaj, sigurisht se do të shfrytëzojmë mekanizmat kushtetues për ti dërguar në Gjykatën Kushtetuese Ligjin për Këshillin Prokurorial të Kosovës dhe Ligjin për Komisionin e Pavarur të Mediave, në mënyrë që të sigurohemi për respektimin e Kushtetutës së Republikës së Kosovës”, ka shkruar Tahiri.