Gjatë fundjavës, në terenet e tenisit në Gërmi, është zhvilluar kampionati ekipor i Kosovës në tenis në të dyja konkurencat ku shkëlqeu Klubi i Tenisit “Peja” duke i fituar titujt në të dyja kategoritë.
Në konkurencën e vajzave, Peja e cila në ekip kishte Aja Broqin dhe Blearta Ukëhaxhajn në finale mposhti Sporekun nga Gjakova me rezultat 2-0 duke mbrojtur me sukses titullin e fituar vitin e kaluar.
Te meshkujt KT Peja ne përbërje kishte dyshen Melos Nallbani / Mal Agushi.
Në gjysmëfinale Peja ishte më e mirë se Prishtina derisa në finalen e madhe Melos Nallbani e Mal Agushi në meçin vendimtar në dyshe mposhtën ekipin e Rilindjes i cili përbëhej nga 2 tenistë me kualitet dhe përvojë shumë të madhe, Shëndrit Deari dhe Granit Bajraliu.
Fillimisht Agushi shënoi fitore ndaj Bajraliut me 2-0 në sete derisa u kundërpërgjigj Deari duke mposhtur Nallbanin me poashtu 2-0 në sete.
Për Pejën në konkurencën e meshkujve ishte ky titulli i parë i kampionit në konkurencën ekipore.