Protesta e serbëve pas plagosjes së dy të rinjve në Shtërpcë, tashmë ka përfunduar pa ndonjë eskalim të situatës.
Komuna e vogël afër qytetit të Ferizajt, Shtërpca, e cila ka një numër të madh të banorëve serbë, siç raporton nga vendi i ngjarjes, gazetari i RTV Dukagjinit, Sylejman Sylejmani, shumë nga ta ishin mbledhur për të protestuar pas plagosjes së dy të rinjve serbë të premten e 6 janarit.
Po ashtu, protesta ishte duke u zhvilluar nën mbikëqyrjen e EULEX-it.
Kryetari i Komunës së Shtërpcës, Dalibor Jevtiq, njëherësh edhe nënkryetar i Listës Serbe, kishte paralajmëruar protestën, lidhur me plagosjen e dy djemve serbë, të cilët u qëlluan me armë zjarri në fshatin Gotovushë.
Ndërsa, Policia ka njoftuar se rruga rajonale Shtërpcë-Prevallë, do të mbyllet për qarkullim të dielën nga ora 11:30, për shkak të protestës së paralajmëruar.
Kujtojmë se, të premten e 6 janarit, Policia kishte njoftuar se ishte arrestuar i dyshuari për plagosjen, dhe se ai gjendej në Policinë Rajonale të Ferizajt. Arma e të dyshuarit ishte konfiskuar dhe njëherit, edhe vetura.
Si gjithherë, ekipi i gazetarëve të RTV Dukagjiini kishte raportuar direkt nga vendi i ngjarjes, duke bërë të ditur se serbët kishin vendosur një barrikadë në rrugën që të dërgon në drejtim të Shtërpcës.
Por, serbët lokalë rreth orës 22:40, në po të njëjtën ditë, kishin larguar barrikadën që ishte vendosur në fshatin Gotovushë të komunës së Shtërpcës.