Katër persona janë arrestuar për shkak të një përleshjeje, si pasojë e së cilës një person ka pësuar lëndime të rënda trupore.
Ngjarja raportohet të ketë ndodhur në mbrëmjen e së mërkurës, në Pejë.
Në raportin 24-orësh të policisë thuhet se dy të dyshuar pas tretmanit mjekësor janë dërguar në mbajtje, kurse një nga të dyshuarit po vazhdon të marrë tretman mjekësor në spitalin e Pejës.
Ai është nën mbikëqyrjen e policisë, ndërsa personi i katërt po trajtohet në Qendrën Klinikë Universitare të Kosovës në Prishtinë.
Policia këtë rast e ka cilësuar si vrasje në tentativë.
“Janë arrestuar 4 të dyshuar meshkuj kosovarë për shkak se ishin përfshirë në një rrahje ndërmjet vete. Njeri prej tyre, gjatë përleshjes, ka pësuar lëndime të rënda trupore pasi është qëlluar me thikë në pjesën e kraharorit. Dy të dyshuar pas tretmanit mjekësor janë dërguar në mbajtje, një nga të dyshuarit është në tretman mjekësor në spitalin e Pejës dhe është nën mbikëqyrjen e policisë ndërsa tjetri është duke u trajtuar në QKUK Prishtinë”, thuhet në raport.