Një autobus që transportonte persona të infektuar me Covid-19 në Kinë, është përplasur duke lënë 27 persona të vdekur, ndërkaq 20 të lënduar.
Ngjarja ndodhi provincën jugperëndimore të Guizhou, megjithatë nuk ka asnjë informacion për shkakun e përplasjes që ndodhi herët në mëngjesin e së dielës së 18 shtatorit.
Sipas rregulloreve kineze, autobusët e pasagjerëve nuk lejohen të lëvizin në autostradë nga ora 02:00 deri në 05:00. Megjithatë, aksidenti ndodhi në orën 02:40 me orën lokale të hënën (18:40 GMT të dielën) pasi autobusi u nis pak pas mesnate, duke treguar se autobusi kishte shkelur rregulloren.
Një grua që pretendoi se ishte vajza e njërës prej viktimave në rrjetet sociale shkroi një shënim duke thënë se “nuk mund ta pranonte” vdekjen e nënës së saj.
“Mamaja ime qëndroi në shtëpi për gjysmë muaji. Ajo nuk shkoi askund përveçse doli për teste PCR… por papritmas u dërgua në karantinë dhe vdiq”, ka thënë ajo për BBC-në, transmeton portali Dukagjini.
Ndërsa, disa përshkruan përvojat e tyre të pakëndshme të transportimit me autobus në objektet e karantinës.
Njëri tha se dhjetëra pasagjerë u shtrydhën në një autobus për 12 orë pa u lejuar të hanin, të shkonin në banjë, të hapnin dritaret ose të ndezin ajrin e kondicionuar deri në mbërritjen e tyre në hotelin e karantinës.
Një koment tjetër pyeti”Kur do të ndalojë e gjithë kjo?”
Derisa pjesa tjetër e botës po përpiqet të jetojë me Covid-in, Kina është e vetmja ekonomi e madhe që ende i jep përparësi luftës kundër virusit mbi pothuajse çdo gjë tjetër.
Vetëm dy persona kanë vdekur nga Covid në provincën Guizhou që nga shpërthimi i pandemisë pothuajse tre vjet më parë.
Guizhou aktualisht po përjeton një rritje të infeksioneve. Provinca regjistroi 712 raste të reja të shtunën – rreth 70% e totalit për Kinën.
Incidenti ndodhi në prag të kongresit pesëvjeçar të Partisë Komuniste në tetor, me diskutimin rreth politikës së vendit për Covid që pritet të jetë në rendin e ditës.
Në kryeqytetin Pekin, më shumë se 21 milionë banorë u kërkohet të qëndrojnë në radhë për testet PCR çdo tre ditë për të hyrë në ndërtesat publike dhe madje edhe dyqanet.