Të mërkurën, në Komisionin për Integrim Evropian, ka pasur komunikim të ashpër të deputetëve të pozitës dhe opozitës.
Deputeti i VV-së, Agon Batusha dhe deputetja e AAK-së, Time Kadriaj janë shtyrë me fjalë teksa zëvendëskryeministri i Kosovës, Besnik Bislimi, po fliste për votimin e marrëveshjeve ndërkombëtare.
“I keni marrë votat dhe duhet t’i gjeni votat, na i kemi votuar dhe po ua përmendim juve që marrëveshjet e më hershme si keni votuar ju’, ka thënë Kadriaj.
Ndërsa, Bislimi u është kundërpërgjigjur duke thënë “Sa herë po kthehemi te e kaluara, po thoni mos u merrni me të kaluarën”.
Sipas Bislimit, me atë që po thotë opozita, “sukseset në qeveri janë sukses i opozitës, ndërsa dështimet janë rezultat i pozitës”.
Ndërsa, kryetarja e këtij komisioni, Rrezarta Krasniqi, ka thënë se ka edhe shumë fusha në raportin e Komisionit Evropian për Kosovën, në të cilat, përmendet se nuk ka pasur reforma.
Ajo i është drejtuar Bislimit duke i thënë se ka një kohë që Ministria e Shëndetësisë është pa ministër në krye, teksa ka shtuar se ka pasur “zvogëlim të buxhetit për fushën e shëndetësisë”.
Por, Bislimi ka thënë se nuk ka logjikë që buxheti i shtetit të dyfishohet për dy vjet, ndërsa të ketë ulje në fushën e shëndetësisë, por sipas tij “secili duhet të dijë të lexojë buxhetin që të mos ketë konfuzione”.
Po ashtu, ai gjatë raportimit të tij në Komisionin për Integrim Evropian, ka thënë se raporti për vendin për vitin 2022 nga Komisioni Evropian, thekson se Kosova ka pasur stabilitet politik përgjatë këtij viti.
Te Qeveria, siç ka theksuar Bislimi, raporti për vendin konstaton se Kosova gëzon stabilitet politik dhe institucional që ofron një mjedis të përshtatshëm dhe mundësi për të zbatuar reforma për integrim në BE dhe për të miratuar legjislacionin e vonuar.
“Raporti për vendin i vitit 2022 i përpiluar nga komisioni Evropian, i cili thekson se Kosova ka pasur stabilitet politik, unë mendoj që për zbatim të suksesshëm të reformave, stabiliteti politik është alfa dhe omega për sukses të reformave”, ka thënë Bislimi.
Te pjesa që përfshin bashkëpunimin rajonal, përfshirë edhe dialogun me Serbinë, Bislimi ka potencuar se raporti për vendin konstaton se Kosova ka vazhduar angazhimin e saj në një sërë nismash të bashkëpunimin regjional, si CEFTA, komuniteti i energjisë, transportit, këshilli i bashkëpunimit rajonal.
Po ashtu, thuhet se Kosova në përgjithësi mban marrëdhënie të mira bilaterale me vendet e tjera që janë në zgjerim dhe shtetet fqinje që janë anëtare të BE-së.
Ndërkaq, sa i përket dialogut, raporti konstaton se dialogu i ndërmjetësuar nga BE-ja për normalizimin e marrëdhënieve mes Kosovës dhe Serbisë, vazhdoi gjatë gjithë periudhës raportuese, me takime të rregullta mujore në nivel të kryenegociatorëve dhe me një takim të nivelit të lartë në Bruksel më 18 gusht 2022.
“Tashmë nga data 23 nëntor, kemi hyrë në një fazë të re të dialogut”, shtoi Bislimi.
Në anën tjetër, Bislimi ka thënë se në këtë raport ka gjëra që shënohen si progres, ka gjëra, për të cilat, qeveria beson që BE-ja ka qenë pak dorështrënguar në theksimin e progresit, por ka edhe konstatime, me të cilat, jodomosdoshmërisht pajtohen.
“Në këtë raport nuk përmendet fjala ndikim politik për punësimet apo ndërhyrjet në institucionet si administratë, gjyqësor, Radio televizionin publik, shkollat, universitetin publik, administratën tatimore dhe doganat, që kanë qenë të përfshira në listën e atyre për të cilat në tri vitet e fundit ka pasur brenga të Komisionit Evropian për interefernca politike”.
Ai, po ashtu, ka thënë se Qeveria stabile në këtë krizë ka mundësuar që duke qenë afër qytetarit, “kemi sukses në vaksinim të plotë, sukses në situatën për energji, dhe sidomos sukses në adresimin e pasojave negative që inflacioni ka pasur te kategoritë e caktuara të shoqërisë”.
Bislimi: Raporti i Komisionit Evropian thekson se Kosova gëzon stabilitet politik