Avokati Kujtim Kërveshi ka njoftuar se do të përfaqësojë në procedurë penale, Azem Kurtaj, i cili është i dyshuar për plagosjen e dy të rinjve në Shtërpcë.
Sipas tij, ai është i autorizuar nga familjari i ushtarit të Forcës së Sigurisë të Kosovës dhe përfaqësimi për të do të jetë pa pagesë.
Po ashtu, ai ka thënë se përfshirja e tyre në mbrojtjen e Kurtajt vjen nga “ndërhyrja e atyre që Kosovën duan ta shohin të rrënuar”.
“Deri në komunikimin e radhës, do të përmbahem nga komentimi i fakteve, të cilat, në mënyrën e përshkrimit siç i ka përshkruar Prokuroria janë fizikisht të pamundura, pa dashur të përjashtoj opsionin e montimit të provave kundër z. Kurtaj siç është ndryshimi i deklaratës së dhënë në publik nga familjarja e njërit nga të dëmtuarit e supozuar e që më jep me besu se kontaminimi politik dhe kaqdashës në këtë rast, dhe/ose ndërhyrja në këtë rast e atyre që Kosovën duan ta shohin të rrënuar ka qenë thirrja kryesore për përfshirjen tonë në mbrojtjen e z Kurtaj”, thuhet në njoftim.
Në këtë njoftim thuhet se në ekipin mbrojtës është edhe avokati nga Ferizaj, Naim Ferati, i cili ka theksuar se vetura e klientit të tij ishte sulmuar me mjete të forta nga një turmë e qytetarëve që po festonin.
“Në ekipin e mbrojtjes do të jetë edhe kolegu Naim Ferati, avokat nga Ferizaj, i cili ka qenë i kyqur në këtë rast paraprakisht në cilësinë e avokatit. Shoqëria jonë e avokatisë, Kerveshi&Partners e vlerëson lart besimin e familjes Kurtaj për të na besuar mbrojtjen ligjore të Azemit”, vijon njoftimi.
Ndryshe, Gjykata Themelore në Ferizaj ka vendosur një muaj paraburgim ndaj të dyshuarit me inicialet A.K. i moshës 33-vjeçare, për plagosjen e dy personave në Shtërpcë.
Seanca gjyqësore për caktimin e masës ndaj pjesëtarit të Forcës së Sigurisë së Kosovës (FSK), i cili dyshohet se ka plagosur dy të rinj serbë, u mbajt të dielën.
Në njoftimin e kësaj gjykate thuhet se është vlerësuar se ekziston dyshimi që në një fshat të Komunës së Shtërpcës, i dyshuari me dashje ka tentuar që t’i privojë nga jeta të dëmtuarit M.S dhe S.S.
Ndërsa, më 6 janar, Policia e Kosovës (PK) njoftoi se dy persona, njëri rreth 11-vjeçar dhe tjetri rreth 21-vjeçar, janë plagosur me armë zjarri, në fshatin Drajkovc në këtë komunë të banuar me shumicë serbe.
Lidhur me rastin, në po të njëjtën ditë, PK-ja ka identifikuar e më pas ka arrestuar të dyshuarin A.K.