Policia e Kosovës këtë vit do të përdorë edhe vetura civile për të monitoruar shpejtësinë në rrugë dhe për të kontrolluar automjetet e paregjistruara.
Kështu ka bërë të ditur drejtori për Komunikacion Rrugor në Policinë e Kosovës, Jeton Rexhepi në emisionin Radar të Radio Dukagjinit.
Rexhepi ka theksuar se qëllimi i kësaj iniciative është që të intervenohet në rritjen e sigurisë rrugore duke evidentuar dhe dënuar kundërvajtësit.
Ai gjithashtu ka shtuar se me ndihmën e këtyre veturave të pajisura me teknologji, do të mund të ndërmerren masa për të forcuar respektimin e rregullave të trafikut.
“Në këtë vit do të kemi edhe veturat civile të cilat monitorojnë shpejtësinë në lëvizje dhe kontrollimin e automjeteve të paregjistruara. I vetmi qëllim është që përmes këtyre pajisjeve jo vetëm përmes prezencës apo përmes patrullimit me vetura të shënjuara por edhe përmes pajisjeve qoftë digjitale qoftë sistemi teniko-teknelogjike që mundësojnë identifikimin dhe ndëshkimin e kundërvajtjeve që të ndikojnë tek respektimi i rregullave të trafikut rrugor”, ka thënë ai.
Po ashtu, sipas tij, Policia e Kosovës ka planifikuar rritjen e numrit të veturave inteligjente në terren, duke synuar të mbulojë sa më gjerësisht regjionet për të kontrolluar automjetet e paregjistruara dhe për të mbikëqyrur shpejtësinë në lëvizje.
“Gjashtë vetura inteligjente janë në terren, me këto vetura jemi duke munduar që të gjitha regjionet të monitorohen të kontrollohen sa i përket automjeteve të paregjistruara të kalimit të shpejtësisë dhe kundërvajtjeve tjera që i dëshmon pajisja përmes sistemit të video-mbikëqyrjes. Në projektin e radhës ideja është që të rritet numri i pajisjeve të veturave inteligjente”, ka deklaruar Rexhepi në emisionin Radar.
Ndër të tjera, ai ka thënë se janë mbi 40 patrulla në ekipe në terren në komunikacion brenda tetë orëve apo një ndërrim.