Policia e Kosovës e ka konfirmuar arrestimin e Korab Gashit në mbrëmjen e 1 korrikut, si i dyshuar për përfshirje në grabitjen e argjendarisë në Suharekë, më 22 nëntor të vitit të kaluar.
Korab Gashi ka qenë në arrati që nga nëntori i vitit të kaluar.
“Policia e Kosovës, sot më 1 korrik 2024, gjatë një opeaconi të organizuar nga njësitet relevante të saj, ka arrestuar në Prishtinë personin e dyshuar me iniciale (K.G.), i cili dyshohet se është i perfshirë në rastin e grabitjes së argjentarisë në Suharekë. I apostrofuari me iniciale (K.G.) ndodhej në arrati që nga muaji nëntor i vitit 2023 dhe tani më është arrestuar nga autoritetet policore”, thuhet në njoftimin e Policisë së Kosovës.
Të dyshuarit e tjerë që gjenden prapa grilave janë Bujar Basha, Leotrim Cakolli, Besart Istrefi, të dyshuar për veprën penale “Grabitje”, kurse Trim Baraku për “Armëmbajtje pa leje”.
Ndryshe, Policia e Kosovës me 13 dhjetor të vitit të kaluar ka kërkuar bashkëpunimin e qytetarëve për kapjen e të dyshuarit për grabitjen e armatosur në një argjendari në Suharekë që ndodhi më 22 nëntor i cili ende është në arrati.
Personi i cili po kërkohet nga policia është Korab Zeqir Gashi, i lindur më 01.03.1982 në Prishtinë.
“Policia e Kosovës është duke hetuar rastin e Grabitjes së Armatosur dhe Plagosjes së Zyrtarit Policor, ndodhur me datë 22.11.2023 në argjendarin në Suharekë. Lidhur më këtë rast, një person i identifikuar ende është në arrati dhe ndaj të njëjtit është lëshuar urdhër arresti nga organet e drejtësisë. Personi i cili po kërkohet është Korab Zeqir Gashi, i lindur me 01.03.1982 në Prishtinë me nr personal 1014599319. Për identifikimin dhe arrestimin e tij kërkojmë bashkëpunimin e të gjithë atyre që kanë informata të rëndësishme”, thuhet në njoftimin e policisë.
Burimet e Portalit Dukagjini bëjnë të ditur se policia i ka këshilluar zyrtarët policorë të kenë kujdes nga i dyshuari.
Për grabitjen e armatosur në Suharekë, deri më tani janë arrestuar shtatë persona, ku njëri prej tyre është liruar.
Cila është e kaluara kriminale e Korab Gashit?
I dënuar më parë për vjedhje të rëndë që kishte kryer në një internet kafe në Prishtinë e në të cilën kishte edhe pronësi bashkë me babanë e tij, Korab Gashi tashmë po ballafaqohet edhe më një rast tjetër për të cilin organet e drejtësisë i janë vënë pas, por që i njëjti është në arrati.
Korab Gashi tashmë ka disa ditë që është në kërkim nga organet e rendit në lidhje me dyshimet se i njëjti është i përfshirë në grabitjen e armatosur në Suharekë në një argjendari si dhe për plagosjen e një zyrtari policor.
Gashi është i njohur për vepra të tilla edhe në të kaluarën. Kjo pasi që i njëjti në vitin 2003 ka qenë në paraburgim për vjedhje të rëndë ndërsa katër vite më pas ishte dënuar për të njëjtën vepër penale.
Korab Gashi ishte në paraburgim nga data 15 gusht i vitit 2003 dhe kishte qëndruar në këtë masë deri më 31 dhjetor 2003.
Masën e paraburgimit ai e kishte mbajtur në burgun e Prishtinës.
Vetëm katër vite më pas, për të njëjtin rast, Gashi ishte dërguar në vuajtje të dënimit. Në bazë të të dhënave të siguruara nga KALLXO.com, dënimin e kishte vuajtur nga 20 gushti i vitit 2007 deri më 27 tetor 2007.
Dënimin ai e kishte vuajtur vetëm dy muaj e më pas ishte liruar. Kjo pasi që kështu kishte vendosur Gjykata Komunale në Prishtinë në atë kohë.
Aktakuza e ngritur në tetor të vitit 2003 mori epilog dënues më 1 shkurt 2007. Trupi gjykues që kishte vendosur rreth fajësisë së Korab Gashit në atë kohë ishin Hamdi Ibrahimi, kryetar i trupit gjykues dhe gjyqtarët Hamza Shala dhe Ymer Neziri, anëtarë.
Çka thotë aktakuza e vjedhjes së rëndë e vitit 2003?
Fillimisht në këtë rast ishin të përfshirë Korab Gashi e Artan Mjeku. Të njëjtit sipas dosjes penale që ka siguruar KALLXO.com, më 19 mars të vitit 2003, pas një marrëveshje paraprake dy të dënuarit kishin hyrë brenda një lokali që shfrytëzohej si internet kafe dhe nga aty kishin marrë 15 shtëpiza, 15 tastatura të kompjuterëve vlera e të cilave ishte 9 mijë e 480 euro.
Dosja përshkruan se lokali ku u krye vepra penale ishte në pronësi të Korab Gashit dhe tre personave të tjerë mes tyre ishte edhe babai i tij.
Vepra ishte kryer në orët e hershme të 19 marsit 2003. Gjësendet dhe pajisjet e vjedhura nga lokali sipas dosjes së prokurorisë dhe gjykatës, ishin bartur nga Artan Mjeku me një kombi e më pas ishin dërguar në shtëpinë e vëllait të këtij të fundit për t’i fshehur.
Qëllimi i kësaj vjedhjeje sipas vendimit të gjykatës ishte që Korab Gashi t’ia kthente një borxh Artan Mjekut në vlerë të 1 mijë e 800 eurove.
Ndarja e pajisjeve të vjedhura ishte, 10 shtëpiza dhe 10 tastatura i takonin Artan Mjekut e Korab Gashit pjesa tjetër.
Me veprimet që ishin kryer në orët e hershme të mëngjesit të 19 marsit të vitit 2003, Gjykata e Qarkut në Prishtinë kishte konstatuar se ishin bërë në bashkëveprim dhe kishin kryer veprën penale të vjedhjes së rëndë.
Për këtë vjedhje, Korab Gashi ishte dënuar me burgim me kohëzgjatje prej 6 muajve ndërsa Artan Mjeku ishte dënuar me 8 muaj burgim.
Për të dy, gjykata kishte thënë se në dënim do t`u llogaritej edhe koha e paraburgimit që kishin mbajtur nga 15 gushti 2003 deri më 22 tetor 2003.
Në deklaratën para gjykatësit, Korab Gashi kishte thënë se me qenë se ishte pronar në internet kafenë ku kishte kryer vjedhjen kishte investuar 1 mijë e 800 euro të cilat ia kishte marrë borxh Artan Mjekut.
Me qenë se i njëjti nuk kishte mundësi t’ia kthente borxhin Mjekut kishin shkuar në lokal në orën 3 të natës kishin hapur derën dhe kishin marrë pajisjet teknologjike për t’ia larë borxhin shokut të tij me të cilin ishte i bashkakuzuar për këtë ngjarje.