Tri veturave të tjera, në raste të ndara, u është vënë zjarri në Leposaviq.
Me anë të një komunikate, Policia e Kosovës ka njoftuar se njëri rast kishte ndodhur në orët e hershme të së shtunës afër çerdhes së fëmijëve me ç’rast, një veturë tjetër me targa të Beogradit që ishte pranë saj ishte kapluar nga zjarri.
Ndërsa, rasti i djegies së një veture tjetër, sipas PK-së, ka ndodhur afër qendrës së sporteve nga disa persona të dyshuar që e kishin djegur atë.
“Më 1 prill 2023 pas mesnatës, në veri të vendit është raportuar se nga persona të panjohur, në dy rate të ndara, janë djegur tri vetura që iu përkasin qytetarëve të nacionalitetit serb. Njëri rast ka ndodhur, më 1 prill 2023, në orët e hershme të mëngjesit (3:40h), në Leposaviq, afër qerdhes së fëmijëve, ku veturat ishin të parkuara skaj rruge. Një veture me targa RKS i është vënë zjarri, po ashtu nga zjarri është përfshirë edhe një veturë tjetër me targa të Beogradit që ishte afër veturës me targa RKS. Në vendin e ngjarjes kanë dalë njësitet policore dhe zjarrfikësit që kanë fikur zjarrin. Rasti tjetër ka ndodhur po ashtu në Leposaviq, afër qendrës së sporteve, ku një veturë me targa RKS është djegur nga persona të dyshuar”, thuhet në komunikatë.
Në të dyja rastet, zjarri është fikur nga zjarrfikësit, gjersa Policia e Kosovës ka dalë në vendin e ngjarjes duke ndërmarrë veprimet e duhura policore.
Rastet vazhdojnë të hetohen.