Posta e Kosovës e ka dënuar ashpër sulmin ndaj zyrës postare në Zveçan 2, sic e emërtuan si “akt kriminal” dhe kërkon hetimin e plotë e këtij rasti. Në reagimin e Postës së Kosovës thuhet se sulmi i mbrëmshëm nuk e “zmbrapsë përkushtimin për të ofruar shërbime cilësore dhe zgjerimin në krejt vendin.
Posta e Kosovës përmes një postimi në “Facebook” njoftoi se së shpejti do kthehet në shërbim zyra postare në Zveçan 2.
“Njoftim
Sot, pas mesnate, zyra postare Zveçan-2, e vendosur në qendër të Zveçanit, është sulmuar me mjete shpërthyese.
Posta e Kosovës Sh.A. dënon ashpër këtë akt kriminal dhe kërkon nga autoritetet kompetente hetimin e plotë të rastit dhe vënien e përgjegjësve para drejtësisë.
Ky sulm nuk na zmbrapsë në përkushtimin tonë për të ofruar shërbime cilësore dhe për të zgjeruar prezencën postare në të gjithë vendin.
Njoftojmë qytetarët se në këtë qytet vazhdon të jetë funksionale edhe zyra postare Zveçan-1, e cila ndodhet në objektin e Komunës.
Falënderojmë Policinë e Kosovës për reagimin e shpejtë dhe profesional. Së shpejti edhe zyra postare Zveçan-2 do të rikthehet në shërbim të qytetarëve”, thuhet në reagimin e Postës së Kosovës.