Presidentja e vendit Vjosa Osmani, ka ngushëlluar familjen dhe bashkëpunëtorët e fotoreporterit Alban Bujari.
Osmani ka thënë se Bujari ishte ikonë e fotografisë dhe dëshmitar i pashoq i historisë sonë më të re duke dokumentuar të vërtetën e Kosovës në vitet më të vështira.
“Me dhembje të thellë morëm lajmin për ndarjen e parakohshme nga jeta të Alban Bujarit, ikonës së fotografisë dhe dëshmitarit të pashoq të historisë sonë më të re”.
“Nëpërmjet objektivit, ai dokumentoi të vërtetën e Kosovës në vitet më të vështira, duke na lënë një arkiv të jashtëzakonshëm kujtese dhe historie. Nga momentet e para të luftës së UÇK-së, ai rrezikoi jetën e tij për t`ia treguar botës imazhet që dëshmuan luftën, sakrificën dhe vuajtjen e popullit tonë”, ka shkruar Osmani.
Tutje ajo ka thënë se përmes fotografive të Bujarit masakrat gjatë luftës u bënë dëshmi të krimeve ndaj Kosovës para syve të botës.
“Përmes fotografive të tij, masakrat në Prekaz, Reçak dhe Rogovë nuk mbetën vetëm plagë të kujtesës sonë, por u bënë dëshmi e krimeve ndaj Kosovës para syve të botës. Me profesionalizëm dhe guxim të rrallë, ai e bëri historinë të pavdekshme përmes imazhit, duke na lënë një trashëgimi të çmuar për brezat që do të vijnë”, ka shkruar Osmani.