Aktuale është çështja e dinarit, por Asociacioni, është tema për të cilën Kosovës i kërkohen veprime me urgjencë.
Për rregulloren e BQK-së që nxorri jashtë përdorimi dinarin serb, sipas zëdhënësit të BE-së, Peter Stano, kryenegociatorët sërish do të diskutojnë në Bruksel, në takimin e caktuar për të enjten.
Edhe pse e pranoi se Asociacioni nuk është tema kryesore, kërkesat për veprime konkrete në drejtim të themelimit, sipas Stanos janë adresuar tashmë disaherë, dhe përmendi kushtëzimin që lidhet me këtë hap.
“Krijimi i Asociacionit të Komunave me shumicë serbe është një obligim tash e një kohë për Kosovën, kështu që duhet të përmbushet urgjentisht. Kjo është përsëritur disa herë nga Bashkimi Evropian, në nivelin më të lartë, atë të liderëve evropianë. Kështu që nëse Kosova nuk arrin që ta përmbush këtë, atëherë kjo nuk do të jetë shenjë pozitive e vullnetit për të ecur drejt normalizimit, që tani është i lidhur me rrugën e Kosovës drejt anëtarësimit”, ka than Stano.
Ndërkohë në Kosovë, opozita janë kritik për faktin që ka përfunduar duke u diskutuar në Bruksel tema e dinarit.
“Këto veprime kanë qenë veprime populliste në mënyrë që të mos e humb mbështetjen dhe përkrahjen Kurti, sepse është viti i fundit pra jemi në vitin e katër të qeverisjes dhe tash është vit zgjedhor dhe kjo ka qenë arsyeja”, ka thënë deputetja e AAK-së, Time Kadriaj.
Ndërkohë për situatën ku takimi i ardhshëm do të ishte i treti që në 3 takime në Bruksel diskutohet për përdorimin e dinarit nga serbët e Kosovës, po kritikohen edhe nga analistë politikë.
“Çështja e dinarit është krejtësisht absurde, sepse ka pasur mundësi të bëhet në mënyrë pakrahasimisht më diplomatike më elegante, më të lehtë me më pak pasoja për Kosovën, ndërsa efektet do të ishin të njëjta, pra do të realizohej qëllimi qeverisë,. Mirëpo KM Kurti e ka zgjedh një rrugë shumë më të vështirë atë të betejës politike dhe tani duhet t’i paguaj faturat e kësaj qasje negative”, ka thënë analisti, Artan Muhaxheri.
Për dinarin dhe implementimin e shpejt të Asociacionit mbrëmjen e së hënës u kontaktua edhe Presidentja Vjosa Osmani nga ndihmës sekretari amerikan, James O’brien i cili shefes së shtetit kosovar ia bëri të ditur rëndësinë e këtyre dy çështjeve që sipas tij janë jetike për Kosovën.