Ministria e Financave, Punës dhe Transfereve ka bërë të ditur se kanë vizituar mbi 1100 pensionistë në shtëpitë e tyre në të gjitha komunat e Kosovës.
Kjo vizitë në shtëpi, sipas njoftimit të Ministrisë, ka për qëllim sigurimin e aksesit më të lehtë dhe të përmirësuar për pensionistët që për shkak të moshës 80-vjeçare e sipër, apo shkaqeve shëndetësore, nuk mund të paraqiten fizikisht në Zyrat e Pensioneve.
Pra, iniciativa synon që pensionistët të kenë mundësinë për të vazhduar të përfitojnë nga e drejta e tyre për pension, edhe në rrethana kur nuk janë në gjendje të lëvizin për të shkuar në zyrat përkatëse.
Për të kërkuar lajmërimin në shtëpi, pensionistët apo familjarët e tyre mund të paraqesin kërkesën në zyrat e Departamentit të Pensioneve ose nëpërmjet adresës elektronike të rajonit të tyre.
Adresat e emailit për çdo rajon janë si vijon:
- Rajoni i Prishtinës: pensionet.pr@rks-gov.net
- Rajoni i Prizrenit : pensionet.pz@rks-gov.net
- Rajoni i Ferizajit : pensionet.fe@rks-gov.net
- Rajoni i Gjilanit : pensionet.gji@rks-gov.net
- Rajoni i Mitrovicës : pensionet.mi@rks-gov.net
- Rajoni i Pejës : pensionet.pj@rks-gov.net
- Rajoni i Gjakovës : gjk@rks-gov.net
Kërkesa duhet të përmbajë informacionin e nevojshëm për identifikimin e pensionistit dhe përfshin emrin dhe mbiemrin, numrin personal, numrin e telefonit të pensionistit (nëse ka), numrin e telefonit të një personi të afërt të pensionistit dhe adresën e banimit.
Pas aplikimit, pensionistët ose aplikuesit do të konfirmohen se kërkesa është pranuar.
Pas verifikimit të të dhënave, pensionistët do të njoftohen 24 orë më parë, përfshirë ditët e vikendit, për realizimin e vizitës nga ekipet mobile. Kjo masë synon të sigurojë që çdo pensionist të ketë mundësinë për të marrë pensionin e tyre pa shqetësime dhe pengesa.