Bojan Bozhoviq, pronari i veturës së djegur në Zubin Potok, i ka quajtur frikacakë ata të cilët e kanë kryer këtë veprim.
Në një postim në llogarinë e tij në Facebook, Bozhoviq ka publikuar disa pamje të veturës së djegur.
“Fatkeqësisht, një lajm i keq. Sonte i mbijetuam terrorit. Frikacakët ma kanë vënë zjarrin makinës në oborr përballë shtëpisë në orën 3 të natës së kaluar”, ka shkruar Bozhoviq.
Ai ka treguar se vetura e djegur të martën mbrëma kishte targat RKS që 16 vjet dhe se e njëjta nuk ishte riregjistruar.
“Falënderojmë zjarrfikësit që u përgjigjën me shpejtësi dhe parandaluan djegien e shtëpisë. Dua të them se vetura nuk është riregjistruar dhe ka 16 vjet regjistrim në RKS”, vijon shkrimi.
Pas njoftimit të Policisë së Kosovës për vënien e zjarrit dhe djegien e një veture më targa RKS në Zubin Potok, ka reaguar edhe ambasadori amerikan në Kosovë, Jeff Hovenier.
Me anë të një postimi në llogarinë e tij në Twitter, këto akte Hovenier i ka quajtur kriminale dhe frikacake.
E për këtë reagim, Bozhoviq ka falënderuar ambasadorin Hovenier.
“Faleminderit ambasadorit amerikan në Kosovë, Jeffrey Hovenier, për dënimin e këtij akti çnjerëzor dhe shpresoj që institucionet kompetente të dalin me emrat e autorëve. Faleminderit edhe të gjithë njerëzve të mirë që janë me mua dhe familjen time në këto momente të vështira”.
Ndërkaq, kjo ngjarje ka ndodhur një ditë pasi Qeveria e Kosovës ka nisur të zbatojë planin në tri faza për riregjistrimin e makinave me targave ilegale serbe në RKS.
Faza e parë përfshin qortimin e shoferëve, e dyta parasheh gjobë deri në 150 euro për ata shoferë, dhe e treta targa provuese.
Zbatimi i këtij plani pritet të përfundojë më 21 prill dhe, nga ajo datë, në qarkullim do të lejohen vetëm makina me targa RKS.