Pas raportimit të dhunimit seksual ndaj 11-vjeçares, të mërkurën e 31 gushtit, në sheshin “Zahir Pajaziti”, në Prishtinë, do të mbahet protesta e organizuar nga Kolektivi për Mendim dhe Veprim Feminist, në mbrojtje të vajzave dhe grave.
Protesta do të nisë në orën 12:00, ku do të kërkohet mbrojtje dhe siguri nga shteti për vajzat dhe gratë, trajtim të drejtë të rasteve të dhunës ndaj grave dhe dënime meritore për dhunuesit, si dhe legalizimin e përdorimit dhe shpërndarjen e gazit irritues për vetëmbrojtje (pepper spray).
“Përdhunimi i shumëfishtë ndaj të miturës raportohet të jetë bërë për shtatë orë. Ky rast i përdhunimit është edhe një alarm që tregon për pasigurinë dhe tmerrin të cilin e jetojnë vajzat dhe gratë në Kosovë, në çdo hapësirë ku ato gjenden. Në Kosovë, rrugët, parqet, sheshet, dhomat e shtëpisë, hapësirat e shkollës a punës janë shpesh edhe vende krimi. Aty vajzat e gratë ngacmohen, dhunohen e vriten. E shteti e shoqëria, përtej sensacionit, heshtin. E kjo heshtje po ua merr sigurinë dhe jetën vajzave e grave”, thuhet në njoftim.
Në njoftimin e këtij grupi është theksuar se përkundër dhunës së dukshme e të përditshme, “shteti është duke dështuar që ta trajtojë sigurinë e grave si çështje të sigurisë publike”.
Sipas tyre, raporte të ndryshme tregojnë që rastet e dhunës ndaj grave hasin në neglizhencë institucionale, me dënime të cilat shpesh janë nën ndëshkimet e parapara me ligj.
Në reagim thuhet se kjo qasje patriarkale është duke i lënë vajzat dhe gratë pa mbrojtje dhe lehtësisht të dhunueshme.
“Kësaj gjendjeje terrori duhet t’i vije fundi. Vajzat dhe gratë në Kosovë nuk mund të jetojnë asnjë ditë tjetër me frikë. Djemtë e burrat nuk mund të amnistohen nga shteti dhe shoqëria për dhunën që ushtrojnë ndaj vajzave dhe grave. Përdhunimi i vajzës së mitur dhe i dhjetëra grave tjera veç gjatë këtij viti përveç që na indinjon, na revolton dhe na fton në radikalizim të mjeteve tona të protestës e vetëmbrojtjes”, thuhet në njoftim.
Përderisa dhuna ndaj vajzave dhe grave veç sa është duke u përshkallëzuar, përgjigjet në vetëmbrojtje do të radikalizohen, thuhet në njoftimin e këtij grupi.
“Aty ku shteti dështon të na mbrojë neve, ne do e mbrojmë vetën me çdo mjet në dispozicion. Deri secila nga ne të jetojë e lirë nga frika dhe dhuna”, vijon njoftimi.
Ndërkaq, edhe të martën e 30 gushtit, në Prishtinë në sheshin “Skënderbeu” është mbajtur një protestë kundër dhunës ndaj vajzave dhe grave.
Iniciatorja e kësaj proteste, Xheraldina Rexhepi, teksa është shprehur e indinjuar, ka thënë se në këtë ngjarje ka dështuar mbarë shoqëria.
“Unë në një moment indinjate e kam postuar një status dhe prej asaj ka marrë iniciativë krejt kjo që po ndodh sot. Kam qenë e indinjuar, sepse është një ngjarje makabre që nuk ka ndodhur rastësisht, nuk ka dështuar askush, në atë që ka ndodhur dje kemi ndështuar të gjithë si shoqëri, së pari familja që nuk e ka ditur ku e ka çikën 7 orë dhe familje e atyre djemve. Të dielën është dhunuar një 21-vjeçare në rrugën Agim Ramadani që është futur në veturë nga dy meshkuj. Ne nuk po bëjmë asgjë”, është shprehur ajo.
Gjatë kësaj proteste, pjesëmarrës ishin edhe shumë burra që kanë dalë në përkrahje të kësaj iniciative.
Rasti i dhunimit të 11-vjeçares, protestohet në sheshin “Skënderbeu” në Prishtinë