Agjencia e Kombeve të Bashkuara për Ndihma ka përjashtuar nga puna disa punëtorë të saj që akuzohen se ishin të përfshirë në sulmin terrorist të Hamasit ndaj Izraelit me 7 tetor.
Një dokument izraelit, që agjencia amerikane e lajmeve Associated Press e siguroi të hënën, detajon akuzat ndaj 12 punonjësve të Organizatës së Kombeve të Bashkuara, të cilët, sipas autoriteteve në Izrael, morën pjesë në sulmin e Hamasit më 7 tetor. Dokumenti pretendon se shtatë prej tyre u futën në territorin e Izraelit, përfshirë dy punonjës që morën pjesë në rrëmbime dhe dy të tjerë në sulmet ndaj vendbanimeve izraelite.
Sipas autoriteteve izraelite, dokumenti, që është ndarë me zyrtarët amerikanë, përmban informacione mbi 12 punonjësit e OKB-së, rolin e tyre në sulm, rolin e tyre si punonjës të OKB-së dhe fotografi.
Në dokument thuhet se sipas informacioneve të mbledhura nga shërbimet e zbulimit, të paktën 190 punonjës të Agjencisë së OKB-së mbi Ndihmat për Refugjatët Palestinezë (UNRWA) janë operativë të Hamasit apo grupit Xhihadi Islamik, pa dhënë prova për këtë.
Sipas dokumentit, më mesin e 12 punonjësve të identifikuar janë nëntë mësues dhe një punonjës social. Njëri akuzohet se ishte armatosur me predhë anti-tank një natë para sulmit, ndërkohë që një tjetër kishte bërë fotografi të njërës prej pengjeve. Disa akuzohen për “pjesëmarrje në aktivitet terrorist” apo koordinim të lëvizjes së kamionëve apo armëve që u përdorën për të kryer sulmin. Dhjetë akuzohen se kanë lidhje me Hamasin dhe njëri me Xhihadin Islamik.
Dy nga 12 të identifikuarit janë vrarë, sipas dokumentit. Sipas OKB-së, njëri prej tyre ende është në proces identifikimi.
Akuzat kanë rritur tensionet tashmë të larta mes Izraelit dhe Agjencisë së OKB-së mbi Ndihmat për Refugjatët Palestinezë. Izraeli thotë se Hamasi i shfrytëzon objektet e organizatës për të strehuar armë apo për të kryer sulme. Agjencia e OKB-së mbi Ndihmat për Palestinezët thotë se nuk toleron sjellje të tilla me dijeni dhe se ka masa të brendshme për të parandaluar keqpërdorimet dhe ajo merr mas ndaj punonjësve që i shkelin rregullat.
Akuzat kundër punonjësve të Agjencisë së OKB-së mbi Ndihmat për Refugjatët Palestinezë, të njohur me shkurtesën UNWRA, i nxitën vendet perëndimore të ngrijnë financimin për këtë organizatë, e cila është tejet e rëndësishme për palestinezët në nevojë në Rripin e Gazës. OKB-ja përjashtoi nga puna nëntë nga 12 punonjësit e akuzuar dhe dënoi “veprimet e dyshuara të tyre”.
Pavarësisht katastrofës humanitare në Gazë, ku zyrtarët thonë se lufta e Izraelit ka shkaktuar zhvendosjen e shumicës së popullatës, donatorët kryesorë, përfshirë Shtetet e Bashkuara dhe Britaninë, e kanë pezulluar financimin. Të hënën atyre u është bashkangjitur Japonia dhe Austria.
Me pjesën më të madhe të buxhetit të pezulluar, UNRWA njoftoi se do të detyrohet të ndërpresë funksionimin e saj brenda disa javësh.
OKB-ja reagoi duke thënë se e tërë agjencia nuk duhet të dënohet për veprimet e disa punonjësve të saj, nga të cilët thotë se do të kërkojë llogari nëse vërtetohen akuzat ndaj tyre. Organizata u ka bërë thirrje donatorëve të vazhdojnë financimin e agjencisë së ndihmave.
Shtetet e Bashkuara janë donatori më i madh i agjencisë së ndihmave për palestinezët. Së bashku me disa vende të tjera, Shtetet e Bashkuara financuan rreth 60% të buxhetit të UNRWA-s në vitin 2022.
UNRWA u ofron shërbimet bazë familjeve palestineze që larguan apo u dëbuan nga territori që Izraeli i mori nën kontroll gjatë luftës së vitit 1948. Refugjatët dhe pasardhësit e tyre përbëjnë shumicën e popullatës në Rripin e Gazës.
Që nga fillimi i luftës Izrael-Hamas, shumica e 2.3 milionë banorëve të Gazës varen nga programet e agjencisë “vetëm për të mbijetuar”, përfshirë nevojat për ushqim dhe strehim, thonë zyrtarët e OKB-së.
Një e katërta e popullatës së Gazës po vuan nga uria ndërkohë që luftimet dhe kufizimet e Izraelit po pengojnë hyrjen e ndihmave.
Ndërkohë Izraeli njoftoi se kishte përparim në bisedimet e së dielës për armëpushim, por se ende ka “dallime të rëndësishme” mes palëve. Qëllimi i bisedimeve është t’i ofrojë Gazës pak pushim nga luftimet dhe më shumë ndihma humanitare dhe të sigurojë lirimin e më shumë se 100 pengjeve që ende po mbahen nga Hamasi./VOA