“Punë e ç’koordinuar dhe me shumë skandale”.
Kështu e ka quajtur kryetarja e Forumit të Gruas në Lidhjen Demokratike të Kosovës (LDK), Jehona Lushaku, punën e ministres së Punëve të Jashtme, Donika Gërvalla.
Lushaku ka thënë se Kosova është duke e pasur një përfaqësim jo dinjitoz nëpër ambasada.
“Një punë pa vizion, një punë e ç’koordinuara edhe në kuptimin e kuadrove, një ndërhyrje flagrante në ambasada. Një mungesë e përfaqësimit dinjitoz nëpër ambasada. Janë shkarkuar dhe janë lënë nga 6 muaj ambasadat pa ambasador”, ka shtuar ajo.
Sipas saj, kjo ndërhyrje e papërgjegjshme po i dëmton imazhin e Kosovës si shtet ku i ka ambasadat.
Lushaku në emisionin “Personale” në RTV Dukagjini tha se mungesa e përkrahjes nga shtetet aleatë të Kosovës vjen edhe si pasojë e politikës së jashtë të dobët të Kosovës nën udhëheqjen e ministres Gërvalla.
“Në përgjithësi kemi një mungesë të përkrahjes nga shtet aleate dhe kjo i bie më së shumti politikës së jashtme. Pasi nuk kemi përfaqësues që nuk dijnë me i adresua kërkesat tona si shtet”, ka thënë Lushaku.
Ajo ka shtuar se nuk ka asgjë të mirë në politikën e jashtme gjatë udhëheqjes së ministres Gërvalla, ku ajo për shkak të mungesës së transparencës ka marrë dënime mijëra euro.
“Paradoksi i qeverisë Kurti”
Lushaku tha se është shumë paradoksale mes asaj që është premtuar nga, Albin Kurti, dhe asaj çka po bën kjo qeveri dhe rezultatet e saj.
“Çuditem nga kjo qeveri se si i ka kritikuar qeveritë e kaluara për mos rezultate, dhe tani kam pyetje se cilët janë numrat e rezultateve të kësaj qeverie, sa njohje i kemi pasur, sa anëtarësime në organizata ndërkombëtare…”, ka shtuar ajo.