Presidenti rus Vladimir Putin dhe presidenti francez Emmanuel Macron kanë rënë dakord që të dërgojnë një ekip nga Agjencia Ndërkombëtare e Energjisë Atomike (IAEA), për të inspektuar centralin bërthamor të Zaporizhzhia të kontrolluar nga Rusia në Ukrainë, ka njoftuar zyra presidenciale franceze.
Në një bisedë telefonike mes dy liderëve të premten e 19 gushtit, Putin ka rënë dakord që misioni të kalonte përmes Ukrainës dhe jo Rusisë, gjë që dëshiron Kievi dhe partnerët e tij perëndimorë.
Të dy liderët janë dakorduar gjithashtu të kishin diskutime përpara vendosjes së një misioni inspektimi, raporton euronews.
Thirrja e Macron drejtuar homologut të tij rus është justifikuar për shkak të rrezikut serioz të sigurisë për centralin bërthamor të Ukrainës në Zaporizhzhia, i cili është subjekt i aktivitetit luftarak, ka thënë një zyrtar në presidencën franceze në një konferencë.
Macron, i cili e ka telefonuar për herë të fundit Putinin në maj, është kritikuar ashpër në të kaluarën për vazhdimin e bisedimeve diplomatike me liderin rus pavarësisht vendimit të tij për të pushtuar Ukrainën.