Paneli Zgjedhor për Ankesa dhe Parashtresa (PZAP), ka marrë vendim që të pranojë ankesën e Lëvizjes Vetëvendosje, e cila kishte kundërshtuar pavlefshmërinë e disa fletëvotimeve në Qendrën e Numërimit dhe Rezultateve (QNR).
Sipas vendimit të PZAP-së, 21 fletëvotime që ishin shpallur të pavlefshme duhet të konsiderohen të vlefshme dhe të përfshihen në rezultatin përfundimtar.
VV-ja kishte dorëzuar ankesë më 1 mars, duke pretenduar se këto fletëvotime ishin shpallur të pavlefshme për shkak të një gabimi teknik gjatë printimit.
Në arsyetimin e PZAP-së thuhet se votuesit i kanë printuar vetë fletëvotimet nga faqja e KQZ-së, por për shkak të kufizimeve teknike të pajisjeve të tyre, disa fletëvotime nuk janë printuar në formën e plotë.
Megjithatë, sipas PZAP-së, qëllimi i votuesve ka qenë i qartë dhe, në përputhje me ligjin, këto vota duhet të numërohen.
