Kryeministri i Shqipërisë, Edi Rama, ka thënë se është koha për deeskalim të situatës në veriun e Kosovës.
Në një konferencë të përbashkët me kryediplomatin e Bashkimit Evropian, Josep Borrell, Rama ka thënë se është i shqetësuar për tensionet aktuale në mes të Kosovës dhe Serbisë.
“Ishte një moment shumë i dobishëm për të biseduar me ju dhe ishte absolutisht shumë e dobishme të bisedoja më parë me presidenten e Komisionit dhe para saj me presidentin e Këshillit Evropian. Sigurisht që është shumë inkurajuese të dëgjosh fjalë të mira për atë që bën Shqipëria. Ne do të vazhdojmë dhe do të jemi në gjendje të jemi gati për hapin tjetër”.
“Jam i kënaqur që më në fund kemi nxjerrë tre policë dhe tani është koha për një deeskalim dhe kjo duhet të ndodhë menjëherë, pasi situata po bëhet urgjente. Jemi pjesë e rajonit që ka vuajtur shumë në të kaluarën dhe nuk mund të shikoj prapa. Jam i përkushtuar dhe Shqipëria është e përkushtuar për të punuar që të mos lejojë që kjo situatë të ndikojë keq në rajon”, ka thënë Rama.
🔴 Watch now the joint press statements of HR/VP @JosepBorrellF and Prime Minister of #Albania @ediramaal https://t.co/8lRW71Gjiw
— European External Action Service – EEAS 🇪🇺 (@eu_eeas) June 27, 2023
Tre policët janë liruar nga paraburgimi më 26 qershor do të mbrohen në liri.
Ata janë arrestuar më 14 qershor.
Ndërkaq, kryediplomati i Bashkimit Evropian, Josep Borell, e ka falënderuar kryeministrin e Shqipërisë, Edi Rama, për përpjekjet që po bën për të gjetur zgjidhje, pas rritjes së tensioneve në mes të Kosovës dhe Serbisë.
“E kam bërë të qartë edhe pas takimit të djeshëm të ministrave të Jashtëm të BE-së se palët duhet t’i ulin tensionet dhe të gjejnë zgjidhje, sipas planit të BE-së, që u është prezantuar atyre javën e kaluar në Bruksel. Situata kërkon hapa të shpejtë dhe zgjidhje të shpejtë, dhe mund t’ju them që vendet janë duke humbur durimin, andaj kërkojnë veprime të shpejta”, ka thënë Borrell në një konferencë për media me Ramën në Bruksel.