Kryeministri i Shqipërisë, Edi Rama, ka thënë se Ukraina do ta ketë gjithmonë mbështetjen e Shqipërisë.
Në një konferencë të përbashkët me presidentin e Ukrainës, Volodymyr Zelensky, pas një samiti të mbajtur për Ukrainën në Tiranë, Rama ka theksuar se Ukraina meriton të mbështetet e të ndihmohet me të gjitha mjetet e nevojshme për t’ rezistuar agresorit.
“Ukraina meriton të mbështetet e të ndihmohet me të gjitha mjetet e nevojshme për të rezistuar e për të siguruar se çdo paqe që do të vijë pas kësaj lufte të jetë paqe e drejtë që mbështetet kryesisht në parimet e planit 10-pikësh të Zelenskyt. E kemi bërë shumë të qartë, jam shumë krenar të them se nuk është vetëm Qeveria, Parlamenti dhe institucionet, por i gjithë kombi, gjithë popullata e vendit tonë që është me Ukrainën dhe e mbështet Ukrainën, pa asnjë lëkundje”, ka thënë Rama.
Ai ka thënë se është i vetëdijshëm për nevojën që ka Ukraina për vendet më të pasura në komunitetin demokratik për t’i dalë ballë pushtimit të Rusisë.
Rama i ka bërë thirrje Perëndimit për dërgim të armëve në Ukrainë, sepse vetëm ashtu mposhtet pala tjetër, si referencë për Rusinë.
Sipas Ramës, pretendimet se ndalja e dërgimit të armatimit në Ukrainë ndal luftën, është cinike dhe absurde, sepse, siç thotë ai, nuk ndalet lufta duke ç’armatosur viktimën, por duke ndalur agresorin.
“Ata pretendojnë se ndalja e dhënies së armëve në Ukrainë ndal luftën, është cinike dhe absurde, sepse nuk e ndal luftën duke çarmatosur viktimën, por duke e ndalur agresorin”, ka vijuar Rama.
Rama ka thënë se përballë Ukrainës është një agresor, i cili nuk po ndalet në përpjekjen për të aneksuar territore e duke marrë jetë të pafajshme dhe duke vazhduar ta shkatërrojë Ukrainën.