Kryeministri i Shqipërisë, Edi Rama, ka reaguar pas sulmit ndaj pjesëtarëve të Policisë së Kosovës, ku një polic është vrarë në përballje me grupe terroriste ushtarake.
“Tragjedia e humbjes së jetës së efektivit të Policisë së Kosovës është këmbana më e madhe e alarmit deri më sot për rrezikun e vazhdueshëm të eskalimit të krizës së zgjatur në një konflikt të armatosur”, ka shkruar Rama.
Më tutje, ai ka thënë se Komuniteti euroatlantik duhet të marrë masa para se eskalimit të mëtejshëm të situatës, pasi sipas Ramës, kjo është mund të “dalë jashtë kontrollit e të kthehet në një zjarr destabilizues për krejt rajonin”.
“Komuniteti euroatlantik duhet të mbledhë të gjithë forcën e tij imponuese dhe të ulë pa kthim Kosovën dhe Serbinë në tryezën e Dialogut të Normalizimit. Thirrja e një konference të jashtëzakonshme paqeje, nën mbikqyrjen e garancinë e Bashkimit Europian dhe Shteteve të Bashkuara, e njëkohësisht marrja e të gjitha masave të jashtëzakonshme me KFOR-in, për moslejimin e eskalimit të mëtejshëm të situatës, janë një domosdoshmëri strategjike jo vetëm për rendin e sigurinë në Kosovë sot, po edhe për paqen e të ardhmen e rajonit nesër, përpara sesa kriza e zgjatur në Veriun e Kosovës të dalë jashtë kontrollit e të kthehet në një zjarr destabilizues për krejt rajonin”, ka theksuar Rama.
“Kriminelët që i morën jetën një njeriu të pafajshëm, i cili shërbente nën uniformën shtetëtore të forcave të rendit të Republikës së Kosovës, duhet të dalin përpara drejtësisë”, ka përfunduar Rama në Twitter.