Ish-kryeinspektori i Agjencisë së Kosovës për Inteligjencë (AKI), Burim Ramadani, ka reaguar ndaj deklaratave të ministrit të Punëve të Brendshme, Xhelal Sveçla.
Sveçla i ka mohuar pretendimet e Ramadanit se ai ishte gjuajtur me armë gjatë një qëndrimi të tij në Ujman në fillim të korrikut.
Por, Ramadani ka insistuar se ka ndodhur gjuajtja me AK-47 teksa Sveçla ishte në një barkë së bashku me disa policë.
“Besoj se ikja nga rafalet e armës afër barkës nuk mund të komentohet si veprim trimërie e lavdie”, ka shkruar Ramadani, teksa ka theksuar se nuk e ka fabrikuar këtë ngjarje siç e akuzoi ministri Sveçla.
“Sidoqoftë, nuk besoj që ndonjëherë në jetë kam fabrikuar gjë”, ka shkruar më tej ish-kryeinspektori i AKI-së.
Në postimin e tij, Ramadani ka akuzuar Sveçlën për mungesë patriotizmi gjatë luftës.
Ramadani gjithashtu shprehu shqetësimin për një të afërm të Sveçlës që, sipas tij, merr në pyetje të tjerët në emër të ministrit.
“Më rrënqethi fryma patriotike e amanetit të Xhelal Sfeçlës. Veç nuk e di ku të pati mbetur amaneti gjatë luftës? Besoj që pate dezertuar apo jo? Apo ndoshta trimërisht e ke zbatuar “planin taktik IBSTL”?! Njëjtë më rrënqeth edhe pasioni i një të afërmit tënd që, në emër tënd, guxon të merr në pyetje tjerët. Madje, më rrënqethin edhe ata dëshmitarë që kanë qenë aty dhe s’kanë bërë zë! Por, nuk është tema kjo pjesë!”, ka shtuar Ramadani.
Ai ngriti gjithashtu pikëpyetje në lidhje me verifikimin e sigurisë së Sveçlës, duke theksuar se ligji kërkon qartë që Ministri i Punëve të Brendshme t’i nënshtrohet këtij procesi. Ai pohoi se Sveçla nuk ka informuar publikun nëse i është nënshtruar verifikimit të sigurisë.
“Puna ime si IP AKI ka përfunduar me nder dhe me falenderim publik më 21 dhjetor 2022 dhe kurrë e asnjëherë, në asnjë rrethanë dhe me asnjë motiv nuk kam përdorur e nuk do të përdori kurrë atë pjesë të jetës sime. Çfarëdo ndërlidhje që tenton ta bësh, është jo vetëm e pabazë, por edhe e ndyrë në esencë! Sepse, ti nuk ke asnjë lidhje me atë që kam punuar unë sipas Ligjit dhe mandatit! Tek e fundit, nuk ke Verifikim të Sigurisë ti për të ditur gjë për punën time!