Gabim të radhës e vlerëson opozita, refuzimin e kryeministrit Albin Kurti që të nis themelimin e Asociacionit si kusht për anëtarësimin e Kosovës në Këshillin e Evropës.
Deputeti i PDK-së, Xhavit Haliti që për disa vjet ka udhëhequr delegacionin e Kosovës në KiE, thotë se Qeveria duhet ta dorëzojë draft-statutin e Asociacionit për vlerësim në Gjykatën Kushtetuese.
“Kushtëzimi nga Kosova ose nga Qeveria i Këshillit të Evropës është një budallaki dhe avanturë e paimagjinueshme për secilin politikan në Evropë, për secilin politikan dhe njeri që merr vesh nga politika dhe merr vesh nga funksionimi i Këshillit të Evropës”, ka deklaruar Haliti.
Me qëndrimin e Kurtit, deputeti Haliti thotë se më së shumti është gëzuar Serbia. E, refuzimi i kushtëzimit, sipas Halitit, është parapërgatitje e kryeministrit për zgjedhje të parakohshme.
“Albini nuk po guxon me ndërmarrë hapat e duhur për ta dorëzuar aty vetëm për një arsye, sepse ai po pret kohën kur do të shpallen zgjedhjet, ku do të thotë se unë u përplasa me krejt botën dhe duke shfrytëzuar mentalitetin ose opinionin i cili nuk është i informuar pse duhet dhe pse nuk duhet”, ka vijuar Haliti.
Ndërsa, kërkesa e ndërkombëtarëve, sipas AAK-së, do të duhej të trajtohej shumë më herët nga Qeveria.
Deputeti Pal Lekaj ka qëndrim më të paqartë nëse Kurti duhet ta dorëzojë draftstatutin në Kushtetuese nëqoftëse ka ende hapësirë për t’ua ndërruar qëndrimin shteteve si Gjermania, Franca dhe Italia.
“Është dashur që paraprakisht të koordinohet dhe jo në momentin e fundit t’i thuhet jo. Ne nuk jemi që të krijohet një Asociacion me kompetenca ekzekutive apo një Asociacion territorial, që do të thotë një autonomi në vete. Por çdo herë kemi qenë që të komunikohet dhe bashkëpunohet me faktorin ndërkombëtar”, ka deklaruar Lekaj.
Për situatën në të cilën gjendet Kosova sa i përket KiE-së, LDK-ja fajëson kryeministrin, pasi nënkryetari i saj Lutfi Haziri vlerëson se Kurti e ka ditur qysh moti që Asociacioni është kusht.
Këshilli i Evropës ka konfirmuar se aktualisht aplikimi i Kosovës për anëtarësim nuk është në agjendën e mbledhjes së Komitetit të Ministrave, e cila mbahet më 16 dhe 17 maj.