Pak orë pas dorëheqjes së Rifat Latifi nga posti i ministrit të Shëndetësisë, partneri i Vetëvendosjes në Qeveri, Partia Guxo, shprehi hapur ambicien për drejtimin e kësaj ministrie.
Ishte deputeti Burim Meta, nga kjo parti që në profilin e tij tha se është koha që Guxo të drejtoj këtë dikaster.
Një ditë pas, deputeti Meta, për Dukagjinin tregoi arsyet pse kjo duhet të ndodh.
“Kjo parti ka në petkun e saj, persona të profilit shëndetësor, persona të suksesshëm në menaxhim si dhe në profesion dhe mendoj se tanimë nuk guxojmë të bëjmë kalkulime, mirëpo duhet të piketohet ashtu personi që mund të përmirësojë këtë sektor. Dhe jam persona të tillë, mendoj dhe besoj se partia Guxo ka persona të tillë”, ka thënë Meta.
Meta, që me profesion është mjek nuk mohon synimin e tij personal që të jetë ministër.
“Nuk mund të them këtë për veten, natyrisht secila parit ka të drejtën e prezantimit të kandidatëve të tyre, dhe unë insistoj se duhet Partia Guxo të jetë pjesë e këtyre debateve, dhe kur të vendoset unë do të pajtohem me vendimin, edhe nëse emri im nuk do të jetë për Ministër”, ka shtuar Meta.
Kjo nuk është hera e parë që kjo parti ka ambicie për të drejtuar dikasterin e shëndetësisë.
Pas dorëheqjes së Arben Vitisë nga kjo pozitë në nëntor të vitit të kaluar, kjo pozitë për pak kohë ishte vakante dhe kishte diskutime se Haxhi Avdyli do ta zëvendësonte Vitinë.
Ky i fundit aktualisht është drejtues i Degës së VV-së për Prishtinë dhe drejtor i një Klinike private në vend.