Ministrja e Ekonomisë, Artane Rizvanolli nuk e ka përjashtuar mundësinë e rritjes së çmimit të energjisë elektrike në stinën e dimrit.
Sipas Rizvanollit, si rrjedhojë e motit të mirë në këtë kohë dhe uljes së kërkesës për energji elektrike, çmimi i rrymës në tregjet ndërkombëtare ka shënuar rënie dukshëm, por kjo sipas saj do të jetë e përkohshme.
“Siç e dini gjatë muajve të verës disa njësi të termocentraleve kanë qenë në remont dhe për pasojë kapacitetet tona nuk kanë mundur ta mbulojnë kërkesën. Pas kësaj është marr vendimi për shpalljen emergjente me rrymën. Duke qenë se situata nuk pritet të stabilizohet, mirëpo pritet që të vështirësohet gjatë muajve të dimrit, duke qenë se bien temperaturat e konsumi të rritet, me gjithë gjatë dy javëve te fundit kemi parë një ulje të çmimit në tregun evropian, por kjo do të jetë e përkohshme”, ka thënë Rizvanolli.
Këtë të martë, Komisioni për Ekonomi, Industri, Ndërmarrësi dhe Tregti ka miratuar vazhdimin e masave emergjente për furnizim me energji për 30 ditët e ardhshme, për shkak të krizës energjetike që ka kapluar vendin.
Kjo ishte kërkesë e ministres së Ekonomisë, Artane Rizvanolli, e cila ka kërkuar në këtë Komision që këto masa të propozuara nga Qeveria të vazhdojnë.