Rusia ka refuzuar apelet për një çmilitarizim të plotë të zonës rreth centralit bërthamor Zaporizhzhia në Ukrainën jugore. Ky veprim do ta bënte fabrikën më të prekshme, tha një zyrtar rus.
Thirrjet vijnë mes shqetësimeve në rritje për sigurinë në lokacionin e centralit bërthamor më të madh në Evropë, pasi të dyja palët akuzojnë njëra-tjetrën për granatimet e zonës.
Centrali bërthamor në Zaporizhzhia ishte një nga vendet e para të kapura nga trupat ruse pas pushtimit të Ukrainës më 24 shkurt.
Sekretari i Përgjithshëm i OKB-së António Guterres dha alarmin pas takimit me presidentin e Ukrainës Volodymyr Zelensky dhe liderin turk, Rexhep Tajip Erdogan në Lviv të enjten e 18 gushtit.
“Çdo dëm i mundshëm në Zaporizhzhia është vetëvrasje”, paralajmëroi Guterres.
Udhëheqësit e Ukrainës dhe OKB-së kërkojnë të sigurojnë centralin bërthamor të mbajtur nga Rusia
Presidenti ukrainas i kërkoi OKB-së të sigurojë çmilitarizimin e centralit bërthamor më të madh në Evropë. Guterres shtoi se “objektet nuk duhet të përdoren si pjesë e ndonjë operacioni ushtarak”.
Erdogan i bëri jehonë shqetësimeve të shefit të OKB-së, duke u thënë gazetarëve se ai ishte i shqetësuar për rrezikun e “një tjetër katastrofe të Çernobilit” që shpërtheu në termocentral.
Zelensky ka kritikuar sulmet e “qëllimshme” ruse në termocentral. Por Ivan Nechayev, zëvendësdrejtor i Departamentit të Informacionit dhe Shtypit të Ministrisë së Jashtme ruse, e hodhi poshtë thirrjen.
Apelet vijnë pasi stafi ukrainas, i cili po punon në uzinë nën drejtimin rus, paralajmëroi për një katastrofë të mundshme bërthamore në objekt, duke thënë se në dy javët e fundit ai është bërë “objektiv i sulmeve të vazhdueshme ushtarake”, raporton BBC.
Më vonë, të enjten e 18 gushtit, një kanal zyrtar në Twitter i përdorur nga qeveria ukrainase tha se anëtarët e Rosatom, korporatës shtetërore bërthamore të Rusisë, ishin larguar “urgjentisht” nga objekti dhe ishte shpallur një “ditë e papritur pushimi”.
“Oficerët ukrainas të inteligjencës besojnë se rusët po përgatisin një provokim në objekt”, ka shkruar në Twitter Qendra e Ukrainës për Sigurinë e Informacionit.