Kancelari gjerman Olaf Scholz, në konferencën për media mbi rëndësinë e samitit të Procesit të Berlinit që po mbahet në Tiranë, ka thënë se e dënon ashpër sulmin terrorist të 24 shtatorit në Banjskë të Zveçanit.
“Morëm një goditje në rajon. Para disa javëve policët e Kosovës u sulmuan në mënyrë brutale, dhe një polic u vra. E dënojmë në mënyrë më të ashpër këtë gjë”, ka thënë Scholz, duke shtuar se në këtë samit e ka thënë qartë se duhet të ketë bashkëpunim rajonal dhe të zgjidhen konfliktet e kaluara.
“Duhet përmirësim konkret e i prekshëm, duhen marrëveshje që lehtësojnë jetën e përditshme, që bashkojnë qytetarët, e që është me rëndësi, marrëveshje që rrisin besimin e ndërsjellë. Procesi i Berlinit nga viti 2014 po kryen këtë detyrë”, ka thënë Scholz, ndërsa ka shpjeguar marrëveshjet arritura të hënën.
Kancelari gjerman e ka falënderuar Shqipërinë për organizimin e Samitit të së hënës.
Këtë sulm terrorist e ka dënuar dhe presidentja e Komisionit të Bashkimit Evropian, Ursula Von der Leyen, e cila e ka quajtur të tmerrshëm sulmin e 24 shtatorit në Banjskë të Zveçanit.
Ajo ka thënë se fuqishëm e kanë dënuar këtë sulm.
Ajo është shprehur se momentalisht janë duke procesuar informatat dhe po presin hetimin e plotë në mënyrë që t’i ndërmarrin të gjitha hapat në bashkëpunim me të gjitha vendet e BE-së.