Lidhur me sekuestrimin e dinarëve në Leposaviq nga Policia e Kosovës, në një intervistë për Radio Dukagjini ka folur avokati, Ardian Bajraktari.
“Proceduralisht, fillimisht duhet të bëhet fotografimi i tyre (dinarëve) dhe natyrisht të ruhen në një vend të përshtatshëm në pritje për t’u proceduar tutje”, ka thënë Bajraktari.
Ai ka thënë se ka mundësi që në këtë rast të kemi të bëjmë me vepra penale kundër ekonomisë.
“Duhet të kemi parasysh që e gjithë kjo ka të bëjë me sekuestrimin që është një masë e përkohshme deri në përfundim të procedures gjyqësore. Nën supozimin se ka elemente të veprës penale edhe këto mjete por dhe të tjerat që identifikohen gjatë procesit, nënkupton që prokurori i çështjes duhet ta përfshijë në aktakuzë në pjesën e së cilës janë edhe pasuritë”, ka thënë avokati, duke shtuar se nëse vërtetohet që ato janë produkte të veprës penale, të njëjtat konfiskohen.
Bajraktari është shprehur se këto mjete kurdo që të konfiskohen do të bëhen pjesë e buxhetit të shtetit.
Avokati ka theksuar se procedura gjyqësore mund të merr edhe vite deri në përfundim të saj, duke potencuar se në varësi prej kompleksitetit të çështjes, vetëm procesi i procedurës hetimore mund të zgjasë deri në dy vjet me mundësi shtimi edhe të një muaji.
Sipas tij, nëse konstatohet që dollarët janë të ligjshëm, atëherë do t’u kthehen qytetarëve.
Mbi 12 milionë dinarë serb e rreth 25 mijë euro janë sekuestruar nga Policia e Kosovës në njësinë ilegale të “Bankës Postare Kursimore”, në Komunën e Leposaviqit.
Lexo më shumë: (Dokument) Sa miliona dinarë u sekuestruan në Leposaviq?
Kështu bëhet e ditur në dokumentin që e ka siguruar Dukagjini nga organet kompetente.
Ky dokument i siguruar nga Dukagjini demanton shefin e zyrës së ashtuquajtur për Kosovë në Qeverinë e Serbisë, Petar Pekoviq, i cili sipas një njoftimi të Partisë Progresive Serbe (SNS), citohet të ketë thënë se në degët e “Bankës Postare Kursimore” nuk ka pasur dinarë.
“Ai shtoi se në kohën e aksionit të policisë së Kosovës në njësitë e “Bankës Postare Kursimore” nuk kishte dinarë nëpër degë dhe se nga pikëpamja e Prishtinës nuk kishte bazë për një aksion të dhunshëm”, thuhet në njoftimin e SNS-së.