Hulumtues i lartë nga Instituti i Kosovës për Drejtësi (IKD), Gëzim Shala, ka deklaruar se ende nuk kanë marr ndonjë informacion nga Presidentja e Kosovës se pse nuk është dekretuar edhe gjyqtari i 49-të.
Shala në intervistë për RTV Dukagjinin në emisionin FIVE, ka thënë se ashtu siç e parasheh ligji vendet për gjyqtar kanë qenë të rezervuara dhe për pesë gjyqtar nuk ka pasur mundësi të plotësohet numri prandaj sipas tij kanë shkuar për dekretim vetëm 49 gjyqtar.
Por, presidentja e Kosovës, Vjosa Osmani Sadriu, ka dekretuar 48 gjyqtarë të rinj, në pajtim me propozimin e Këshillit Gjyqësor të Kosovës (KGJK).
“Ende nuk kemi marr informacione se pse nuk është dekretuar edhe gjyqtari i 49-të”, ka deklaruar Shala.
Ndërkaq, sipas tij ka një mori arsyesh se pse ka ndodhur kjo.
“E para është për shembull vetë kandidati në fazën finale është tërhequr që ka pasur shumë këso raste edhe në të kaluarën, nëse presidentja ka kërkuar informata shtesë apo nëse e ka kthyer ne rivlerësim vendimin e Këshillit Gjyqësor të Kosovës”, ka thënë Shala për RTV Dukagjinin.
Ndërsa, për numrin dekretues të gjyqtarëve ai ka thënë se do të jenë për shtesë, dhe zëvendësim i atyre që janë dal në pension, pasi sipas tij vazhdimisht gjyqtarët pensionohen.
Gjithashtu, për përvojën e tyre në punë si gjyqtar, Shala ka deklaruar se ata kanë të paktën tri vite përvojë pune dhe se janë emëruar për një mandat fillestar.
“Ata kanë të paktën tri vite përvojë pune, emërimi i tyre është bërë për një mandat fillestar”, ka deklaruar Shala.
Po ashtu gjyqtarët e dekretuar do të bëjnë edhe një punë tri vjeçare për tu rivlerësuar nga Këshilli Gjyqësor i Kosovës, dhe nëse e kalojnë këtë rivlerësim ata do të mund të fillojnë me mandat të përhershëm.