Njohësi i çështjeve të sigurisë, Drizan Shala, përmes një njoftimi në Facebook ka bërë të ditur për kërcënimin hibrid që po i bëhet Kosovës duke shkaktuar dëm, pasiguri dhe paqëndrueshmëri në vend.
“Metodat për ta arritur këtë përfshijnë përhapjen e dezinformatave, ushtrimin e presionit, terrorizmin, krimin, sabotimin e furnizimeve me energji dhe ujë dhe infrastrukturë tjetër kritike – ato mund të përfshijnë edhe veprime ushtarake”, ka shkruar Shala.
Ndër të tjera, ai ka pyetur se a duhet që qytetaret të jenë të vetëdijshëm dhe të shqetësuar “për kërcënime të tilla?”.
Krejt kjo si pasojë që “kërcënimet hibride shkaktohen nga operatorë të jashtëm, të tillë mund të jetë ose jo një shtet (rastin tonë Serbia). Për më tepër, edhe kur një shtet qëndron pas një kërcënimi, ai do të përpiqet ta mbajë të fshehur përfshirjen e tij për të parandaluar identifikimin si autor”.
Ai ka vazhduar tutje duke thënë se “kjo do të çojë në ndikimin, ndërhyrjen dhe shkatërrimin që ndodh në nivel lokal, ne gjithashtu duhet t’i kushtojmë vëmendje se nga i marrim “lajmet” tona dhe çfarë lloj informacioni kërkojmë në mediat sociale”.
Ai ka bëre të ditur se duhet të jemi vigjilentë dhe të “vetëdijshëm se shumë njerëz i përdorin qëllimisht këto kanale në një përpjekje për të ndikuar në mendimet dhe opinionet tona, si në mënyra të mira ashtu edhe në të këqija”.
“Ne gjithashtu duhet ti kushtojmë një fenomenit rendësi e që në praktike dihet me termin ‘flluska’, për shembull, në mediat sociale njerëzit priren të flasin më shumë me ata që ndajnë të njëjtat pikëpamje. Kjo mund të forcojë lehtësisht paragjykimet tona dhe çdo nocion të pasaktë që mund të kemi”, vijon ai.
Përndryshe një kërcënim sipas tij “krijohet kur një i huaj vepron nën një identitet të rremë dhe ndikon negativisht në opinionet e njerëzve në mediat sociale, për shembull, ose kur ata fitojnë akses në rrjetin tonë të infrastruktures kritike apo edhe në jetën e individëve privatë. Kjo do të thotë që operatori i jashtëm mund të ndryshojë polarizimin natyror dhe ta transformojë atë në diçka të pashëndetshme, një përzierje kërcënimesh hibride”.
“Siguria është liri, përgatitja është mençuri!”, ka përfunduar Shala.