Kryeministri, Albin Kurti, nuk ka arritur të paraqitet sot në Prokurorinë Speciale të Kosovës për intervistim, pasi ndodhet në një udhëtim zyrtar jashtë vendit.
Ai ishte ftuar nga Prokuroria Speciale për të dëshmuar në cilësinë e dëshmitarit në lidhje me rastin e rezervave shtetërore.
Kurti nuk paraqitet për intervistim në Prokurorinë Speciale
Zëdhënësja e Prokurorisë Speciale, Liridona Kozmaqi, ka konfirmuar se kabineti i kryeministrit ka njoftuar institucionin për arsyet e mungesës.
Nga ana tjetër, Qeveria e Kosovës ka bërë të ditur se Kurti është i gatshëm të bashkëpunojë me Prokurorinë.
Sipas zëdhënësit të Qeverisë, Përparim Kryeziu, kryeministri ka shprehur gatishmëri për të pritur prokurorët në zyrën e tij në një ditë dhe orë të dakorduar nga të dyja palët.
“Prokuroria Speciale, përkatësisht prokurorët e rastit janë njoftuar se për shkak që kryeministri është jashtë vendit me agjendë të konfirmuar kohë më parë, ai nuk mund të jetë i pranishëm sot sipas ftesës së prokurorisë. Megjithëkëtë, kryeministri Kurti ka shprehur gatishmërinë t’i mirëpres prokurorët e rastit në zyrën e tij në një ditë dhe orë të dakorduar nga të dy palët për të përmbushur kërkesën e dalë nga ftesa e prokurorisë”, ka thënë Kryeziu.