Shkolla fillore dhe e mesme e ulët, “Hasan Prishtina” në kryeqytet, të martën do ta fillojë mësimin me orar të reduktuar.
Në njoftimin e tyre thuhet se, ky vendim është marrë pas takimit të Këshillit të Arsimtarëve dhe të Këshillit Grevist të Sindikatës së shkollës, ku është vendosur që të përkrahet greva, por edhe të fillojë mësimi me orë mësimore, të cilat do të zgjasin nga 30 minuta.
“Në takimin e sotëm të Këshillit të Arsimtarëve dhe të Këshillit Grevist të Sindikatës së shkollës, pas diskutimeve u vendos që të përkrahet greva deri në realizimin e kërkesave, por edhe në anën tjetër nga nesër, më 27 shtator të fillojë procesi mësimor me orar të reduktuar të orëve mësimore në 30 minuta”, thuhet në njoftimin e kësaj shkolle.
Grevat e sindikatave kanë filluar që nga data 25 gusht e këtij viti dhe janë duke vazhduar ende. Kërkesë kryesore e tyre është shtesa prej 100 eurosh, deri në miratimin e Ligjit të Pagave, i cili tashmë është në konsultim publik.