Kryeministri i Shqipërisë, Edi Rama, ka njoftuar se ka ndërprerë marrëdhëniet diplomatike me Iranin, për shkak të sulmit kibernetik ndaj institucioneve qeveritare.
Rama ka njoftuar se vendimi i është bërë i ditur Ambasadës së Republikës Islamike të Iranit në Tiranë. Sipas njoftimit të shtetit shqiptar, personelit diplomatik dhe tekniko-administrativ i është kërkuar largimi brenda 24 orëve nga territori i Republikës së Shqipërisë.
“Në 15 korrikun e shkuar vendi ynë u bë objekt i një sulmi të rëndë kibernetik, i cili kishte si objektiv shkatërrimin e infrastrukturës digjitale të qeverisë së Republikës së Shqipërisë, si edhe grabitjen e të dhënave dhe të komunikimeve elektronike nga sistemet qeveritare”, ka thënë Edi Rama.
Kryeministri i Shqipërisë ka shtuar se sulmi nuk ia arriti qëllimit.
“Krahasimisht me objektivat e agresorëve, dëmet mund të konsiderohen të vogla. Sistemet u rivunë të gjitha në punë dhe asgjë nuk u zhduk pa kthim”.
I pari i qeverisë shqiptare ka shtuar se për javë të tëra është punuar paralelisht për rivënien e të gjitha sistemeve në punë, qoftë për hetimin për gjetjen e agresorëve.
“Hetimi i thelluar na vuri në dispozicion prova të pakundërshtueshme, se agresioni kibernetik ndaj vendit tonë është orkestruar dhe sponsorizuar nga Republika Islamike e Iranit, e cila ka angazhuar katër grupe për sulmin ndaj Shqipërisë. Ndër to edhe një ndër grupet më famëkeqe të terrorizmit kibernetik ndërkombëtar, autor apo bashkautor i sulmeve të mëparshme kibernetike mbi Izraelin, Arabinë Saudite, Jordaninë, Emiratet e Bashkuara, Kuvajtin dhe Qipron”, tha Rama.
Kryeministri njoftoi se kanë informuar aleatët strategjikë, vendet partnere të NATO-s dhe disa vende të tjera mike, me të cilat kanë ndarë edhe rezultatet e pakundërshtueshme të hetimit.
Rama shtoi se duke filluar nga Këshilli i Ministrave, është vendosur me efekt të menjëhershëm për ndërprerjen e marrëdhënieve diplomatike me Republikën Islamike të Iranit.
“Kjo masë ekstreme, aspak e dëshiruar po krejtësisht e detyruar, është në proporcion të plotë me seriozitetin dhe rrezikshmërinë e sulmit kibernetik, i cili kërcënoi paralizimin e shërbimeve publike, fshirjen e sistemeve dhe grabitjen e të dhënave shtetërore, vjedhjen e komunikimeve elektronike brenda sistemit qeveritar dhe nxitjen e pasigurisë e të kaosit në vend”, shton Rama.
Kryeministri i Shqipërisë ka thënë se dështimi i këtij sulmi masiv mbi vendin, falë rezistencës së sistemeve që kanë ngritur, nuk është fundi i kërcënimit kibernetik, por thjesht prova se tanimë edhe Shqipëria ka hyrë, falë zhvillimit digjital, në hartën e gjerë të luftës për sigurinë kibernetike.
Por, lajmi i mirë sipas Ramës është se e dinë se çfarë duhet të veprojnë për të mos u përsëritur sulmi kibernetik.
Rama për sulmin e fuqishëm kibernetik: Është i organizuar nga një shtet