Në shkurtin e vitit 2023, kryetari atë kohë i Preshevës e kaloi kufirin dhe në Prokurorinë Speciale të Kosovës, dorëzoi kallëzim penal ndaj Kryetarit të Këshillit Kombëtar Shqiptar.
Shqiprim Arifi pretendonte se ka fakte për keqpërdorimin e 2 milionë eurove të ndara nga Qeveria e Kosovës për Shqiptarët e Luginës.
“Ju e shihni Ragmi Mustafin këtu i cili është kryetar i KKSH-së që e ka shpallë konkursin, janë 45 mijë euro që ja ka dhanë një OJQ-jë që është themelu 3 ditë para konkursit për me i recitu 3 vjersha për 45 mijë euro…këtu e shihni Ardita Sinanin që është Këshilltare e kryeminsitrit Kurti e cila ja ka shpërnda një anëtarë ja ka shpërnda 27 mijë euro një shoqate fantome…i ka marrë 25 mijë euro sepse është mik i Liburn Aliut… i ka marr 25 mijë euro vetëm se e ka një portal (dhe është mik i deputetit Shaip Kamberi”, ka deklaruar Shqiprim Arifi – ish-kryetar i Preshevës.
Inatet politike, duket se qëndrojnë prapa edhe një veprimi tjetër që u raportua gjërësisht në muajin dhjetor.
Qeveria e Kosovës, synoi që përmes Këshillit Kombëtar Shqiptar, të ndajë subvencione për rreth 1,200 bujq.
Por pasardhësi i Arifit, e ka sfiduar bazën ligjore për ndarjen e buxhetit, dhe me një letër ka kërkuar sqarim nga Ministrisë për Minoritetet në Beograd.
“Është kërkesë thjesht për sqarim duke e ditur se opinioni i gjerë është i vetëdijshëm se Këshilli Nacional Shqiptar nuk është i thirrur për shpallje ose veprimtarinë e bujqësisë”, ka deklaruar Visar Memeti – Kryetar i Alternativës për Ndryshim.
Ministria që për ironi mbanë përgjegjësitë e të drejtave të njeriut dhe minoritetet fillimisht, kishte dhënë afat 8 ditor që Këshilli të sqarojë bazën ligjore.
“Diku 138-139 milionë euro vetëm në vitin 2024 Qeveria e Serbisë ndanë për serbët e Kosovës, ndërkohë tashmë kanë filluar iniciativat për bllokimin e 1 milion eurove që Kosova po ndanë për shqiptarët e Luginës së Preshevës”, ka deklaruar Nevzad Lutfiu – Kryetar i Këshillit Kombëtar Shqiptar.
Më 10 dhjetor Beogradi kërkoi që konkursi të anulohet me pretekstin se është i kundërligjshëm.
“Ne nuk do të zbrapsemi do të vazhdojmë tutje në mënyrat edhe tjera por kryesisht është qëllimi parësor është që bujqit apo fermerët dhe të tjerët të kenë fondin e tyre të veçant që ua ka dedikuar Republika e Kosovës”, ka deklaruar Enkel Rexhepi, nënkryetar i Këshillit Kombëtar Shqiptar.
Fondet mbeten në arkë, përderisa sa po shqyrtohen mundësitë se si të shkojnë në xhepat e bujqve shqiptarë në Serbi.
Synimet e pushtetit në Serbi për t’i bllokuar fondet që i dedikohen shqiptarëve atje mbeten të qarta, por në raste, gara politike në raste e pakuptimtë ndërmjet përfaqësuesve politik shqiptar të një komuniteti që ballafaqohet me sfida të shumta, po i dalin në ndihmë Beogradit që të realizojë synimet e saja.