Shërbimi Spitalor Klinik dhe Universitar i Kosovës (ShSKUK) dhe Fakulteti Filozofik, përkatësisht Departmenti i Psikologjisë, në kuadër të Universitetit të Prishtinës, “Hasan Prishtina”, kanë nënshkruar marrëveshje bashkëpunimi.
Sipas njoftimit të ShSKUK-së, dy palët janë pajtuar që profesionistët nga të dy institucionet duhet të “krijojnë sinergji në studimet e përbashkëta me qëllim të përmirësimit të shërbimeve shëndetësore dhe rritjes së njohurive shkencore në lëminë e psikiatrisë dhe psikologjisë”.
Në emër të drejtorit të përgjithshëm të ShSKUK-së, Elvir Azizi, marrëveshjen e ka nënshkruar u.d. drejtori i QKUK-së, Osman Hajdari dhe dekani i Fakultetit Filozofik, Dashamir Bërxulli.
Tutje thuhet se marrëveshja parasheh që psikiatrët, psikologët, profesorët universitarë, studentët, personeli edukativo-arsimor, “mund të kontribuojnë në identifikimin e faktorëve me ndikim në shëndetin mendor dhe mund të zhvillojnë dhe pilotojnë intervenime parandaluese dhe trajtuese”.
Po ashtu, kjo marrëveshje parasheh që njësitë Organizative të ShSKUK-së të ofrojnë mundësi për praktikë për studentët e vitit të tretë të nivelit të studimeve bachelor dhe studentët e nivelit të studimeve master të Departamentit të Psikologjisë.