E ka fituar Ligën e Kampionëve, La Ligën, Ligue 1, Kupën e Amerikës, numëron shtatë topa të artë, gjashtë këpuca të arta e qindra rekordre tjera, por trofeun më të madh në nivel të kombëtares nuk e ka shijuar akoma.
Me shiritin e kapitenit në krah, e me shumë përvojë në supe, Leo Messi është nisur për në Katar.
Në sirtarin e tij ka një hapësirë: Kupa e Botës.
“La Albiceleste” është e mbushur me yje, në secilin repart dhe statistikat tregojnë që nën urdhërat e trajnerit Lionel Scaloni gjërat kanë ndryshuar pozitivisht.
Hera e fundit kur kjo kombëtare ka pësuar humbje ishte tre korriku i vitit 2019.
Që nga atëherë “humbja” është fjalë e panjohur më ameriko-latinët.
Tashmë, Messi është 35 vjeçar dhe kjo me shumë gjasë është hera e fundit që do të marrë pjesë në një turnir të tillë. Rrugëtimin mund ta mbyllë si fitues, ose si humbës, fusha e gjelbër do të flas më së miri.
Statistikat e Messit në Kampionatet Botërore të mëparshme:
2006: tri ndeshje, një asistim, një gol.
2010: pesë paraqitje një asistim, asnjë gol.
2014: shtatë ndeshje, një asistim, katër gola.
2018: katër paraqitje, dy asistime, një gol.
Më së afërmi për ta fituar botërorin, Messi ishte në vitin 2014, kur ishte mposhtur në finale nga Gjermania, me rezultat minimal 1-0.
Argjentina gjendet në Grupin C së bashku me Meksikën, Arabinë Saudite dhe Poloninë.