Policia në Gambia ka nisur një hetim për vdekjen e 66 fëmijëve, të cilët kanë qenë të lidhur me katër marka shurupi të importuar për kollën.
Zyrtarë të lartë nga Agjencia e Kontrollit të Mjekësisë dhe importuesit, janë thirrur në pyetje, tha zyra e presidentit.
Presidenti Adama Barrow tha se autoritetet “nuk do të lënë gur pa lëvizur” në hetim.
Gambianët të zemëruar për atë që ndodhi, po pyesin se kush është fajtori.
Të mërkurën, Organizata Botërore e Shëndetësisë (OBSH) lëshoi një alarm global për katër shurupet e kollës – duke paralajmëruar se ato mund të lidhen me dëmtimet akute të veshkave dhe vdekjen e fëmijëve në korrik, gusht dhe shtator.
OBSH: Shurupet për kollën mund të lidhen me vdekjën e 66 fëmijëve në Gambia
Prindërit e pikëlluar i kanë thënë BBC-së se si fëmijët e tyre ndaluan së urinuari pasi iu dhanë shurupet. Ndërsa gjendja e tyre u përkeqësua, dhe përpjekjet për të shpëtuar jetën e tyre dështuan.
Produktet – Promethazine Oral Solution, Kofexmalin Baby Cough Shurup, Makoff Baby Cough Shurup dhe Magrip N Cold Shurup – u prodhuan nga një kompani indiane, Maiden Pharmaceuticals, e cila nuk kishte dhënë garanci për sigurinë e tyre, tha OBSH.
Edhe qeveria indiane po heton situatën. Firma nuk i është përgjigjur një kërkese të BBC për koment.
Zyrtarët shëndetësorë të Gambisë dhe punonjësit e Kryqit të Kuq tani po shkojnë derë më derë, si dhe në farmaci dhe tregje, duke kërkuar shurupe si dhe ilaçe të tjera.
Më shumë se 16,000 produkte janë gjetur deri më tani dhe janë marrë për t’u shkatërruar, tha një zyrtar i Kryqit të Kuq për BBC.
Të premten, Presidenti Barrow iu drejtua kombit duke shprehur keqardhjen e tij për humbjen e jetëve, duke thënë se “burimi i drogës së kontaminuar” do të hetohej.
Ai njoftoi planet për të hapur një laborator të aftë, për të testuar nëse ilaçet janë të sigurta dhe një rishikim të ligjeve dhe udhëzimeve përkatëse për barnat e importuara.
Ai tha gjithashtu se “shifra e vdekshmërisë së fëmijëve prej 66 nuk ndryshon shumë me të dhënat e regjistruara për periudha të ngjashme në të kaluarën”, gjë që i la disa të pyesin nëse autoritetet mendonin se këto vdekje ishin të pazakonta.
Presidenti e vazhdoi me një deklaratë më të fortë të shtunën, duke i pezulluar licencën importuesit të dyshuar dhe duke shpallur hetimin policor.
Disa nga prindërit që humbën fëmijët, i kanë thënë BBC-së se po mendojnë të ndërmarrin veprime ligjore kundër autoriteteve.