Raketa më e fuqishme e zhvilluar ndonjëherë është gati të lëshohet.
E njohur si Starship, raketa është ndërtuar nga kompania SpaceX e sipërmarrësit amerikan, Elon Musk.
Është pothuajse 120 metra e lartë dhe ka gati dyfishin e vrullit të çdo rakete tjetër në histori.
Raketa pa ekuipazh do të niset nga një bazë në Teksas të Shteteve të Bashkuara. Synimi është që ajo të fluturojë në drejtim të lindjes dhe të përfundojë një qark të globit për rreth 150 minuta.
Kjo do të jetë përpjekja e parë e SpaceX për të nisur një automjet Starship të montuar plotësisht, duke u mbështetur në një fushatë testimi shumëvjeçare.
Musk ka apeluar te të gjithë që të kenë pritshmëri të kufizuara.
Nuk është e pazakontë që një raketë të përjetojë njëlloj dështimi gjatë nisjes së parë.
“Është lëshimi i parë i një rakete shumë të komplikuar, gjigante, kështu që mund të mos lëshohet. Ne do të jemi shumë të kujdesshëm dhe nëse shohim ndonjë gjë që na shqetëson, do ta shtyjmë ngjarjen”, ka thënë Musk
Madje, Musk ka thënë se qëllimi i tij i vetëm për themelimin e SpaceX ishte të zhvillonte një automjet si Starship, që mund të krijonte një vendbanim njerëzor në Mars, raporton CNN.
Për më tepër, NASA ka dhënë tashmë kontrata dhe opsione të SpaceX, me vlerë disa miliarda dollarë, për të përdorur Starship për të transportuar astronautët qeveritarë në sipërfaqen e Hënës nën programin Artemis të agjencisë hapësinore.
SpaceX do të përpiqet ta nisë raketën në orën 07:00, sipas kohës lokale.
Pritet që mijëra spektatorë të mblidhen në vendet bregdetare në Gjirin e Meksikës për ta parë ngjarjen.