Furnizimi me energji dhe ujë u ndërpre në disa zona të Kievit pas një sulmi masiv ajror rus të hënën, sipas informacionit të dhënë nga kryetari i bashkisë së qytetit, Vitali Klitschko.
Prodhuesi më i madh privat i energjisë në Ukrainë, DTEK, ka njoftuar ndërprerje emergjente të energjisë për shkak të këtyre sulmeve, raporton “The Guradian”.
E gjithë Ukraina ishte nën alarm për sulme ajrore të reja herët të hënën, në mes të kërcënimit për një ofensivë të madhe me raketat dhe dronët rusë, sipas ushtrisë ukrainase.
Pas disa valëve sulmesh me dron gjatë natës, Forca Ajrore e Ukrainës raportoi lëshimin e disa raketave dhe dhjetëra dronë që kërcënonin të gjithë vendin.
Të paktën tre persona janë vrarë gjatë këtyre sulmeve, sipas autoriteteve rajonale. Viktimat janë raportuar në rajonet perëndimore të Lutsk, Dnipro lindor dhe Zaporizhzhia jugore.
Zhurmat e shpërthimeve janë dëgjuar në qendër të Kievit, ku forcat ajrore informuan se Rusia kishte 11 bombardues strategjikë TU-95 në ajër dhe kishte lëshuar një numër raketash.
Autoritetet lokale raportuan shpërthime në qytetin veriperëndimor të Lutsk dhe njoftuan se një bllok apartamentesh ishte dëmtuar, duke theksuar se janë duke verifikuar viktimat e mundshme.
Komanda Operative e forcave të armatosura polake njoftoi se avionët polakë dhe aleatë ishin aktivizuar për të përballuar sulmin rus, i cili gjithashtu synonte rajone në perëndim të Ukrainës dhe afër kufirit polak.
Ambasada e ShBA-së kishte lëshuar një paralajmërim për rrezik të lartë sulmi javën e kaluar, rreth Ditës së Pavarësisë së Ukrainës, e cila u shënua të shtunën.
Ukraina ka rritur sulmet e saj me dronë me rreze të gjatë veprimi ndaj Rusisë në një përpjekje për t’u kundërpërgjigjur ndaj Moskës, e cila filloi një pushtim të plotë të Ukrainës në shkurt 2022.