Ambasadori i Gjermanisë në Kosovë, Jorn Rohde, ka reaguar lidhur me sulmet ndaj gazetarëve në veri të vendit gjatë ditës së djeshme.
Përmes një postimi në Twitter, Rohde ka thënë se realiteti i kësaj skene është tronditës dhe se shumë e kanë dënuar këtë akt të papranueshëm dhune.
“Por fatkeqësisht deri më tani nuk shoh asnjë reagim nga përfaqësuesit e Listës Serbe mes tyre. Pse?”, ka shkruar Rohde.
Sipas ambasadorit të Gjermanisë në Kosovë, të gjithë duhet të bëjnë pjesën e tyre për të depërshkallëzuar situatën.
The brutality of this scene is shocking. Where is this supposed to end? Many have condemned this unacceptable act of violence, but unfortunately so far I don’t see any reaction by SL representatives among them. Why? Everyone needs to do their part to de-escalate the situation. https://t.co/LvzfZwsAIW
— Ambassador Jörn Rohde (@GermanAmbKOS) June 17, 2023
Kujtojmë që dita e djeshme (e premtja e 16 qershorit) ishte e rëndë për gazetarët, në drejtim të të cilëve u hodhën gurë e shok-bomba nga protestuesit në këtë komunë.
Nga këto sulme, 9 gazetarë kanë pësuar lëndime serioze, ku më seriozisht janë lënduar kameramani i RTK-së, Bardh Bekteshi dhe gazetari i portalit “Arbresh”, Pleurat Salihu.
Cak i këtyre sulmeve ishte dhe gazetarja e RTV Dukagjini Dorentina Thaçi, e cila është goditur me gurë në kokë.
Një situatë edhe më e rëndë ka ndodhur me kameramanin e RTV Dukagjini, Leonard Berisha, në tentimin për t’u larguar nga turma kriminale, ka vrapuar në drejtim të ushtarëve të KFOR-it, por as këta nuk i kanë ofruar ndihmë.