Brenda 2 orësh, procesi gjyqësor ndaj Lazar Dejanoviq mori epilog sot në Gjykatën Themelore të Prishtinës.
I akuzuar për sulm ndaj KFOR-it e Policisë së Kosovës gjatë majit të 2023 në Zveçan, në mëngjes nisi seanca fillestare ndaj tij e vetëm pak orë më vonë, u shpall edhe vendimi meqenëse Prokuroria arriti marrëveshje me të për pranim të fajësisë.
Dejanoviq u dënua 8 muaj burgim dhe gjobë 10 mijë euro për veprën penale të huliganizmit dhe për sulm ndaj personit zyrtar.
“Pas pranimit të kërkesës për negocimit të pranimit e fajësisë nga ana e avokatit të pandehurit, dhe pas pranimit të autorizimit të kryeprokurorit të prokurorisë speciale kam zhvilluar negociatat për marrveshjen në lidhje me pranimin e fajësisë me palën mbrojtëse dhe të pandehurin dhe me të njëjtin kemi arritur marrëveshje për pranimin e fajësisë me datë 14.10.2024”, tha prokurori, Bekim Kodraliu.
E Lubomir Pantoviq avokati i të akuzuarit, tek foli për rrethanat lehtësuese, tha se Dejanoviq nuk kishte qenë organizator gjatë protestave të dhunshme që ndodhën gjatë 2023.
“I ka gjuajtur dy a tri shishe në drejtim të tyre, nuk ka qenë as udhëheqës e as organizator,” deklaroi Pantoviq.
Prokuroria Speciale e Kosovës ka ngritur aktakuzë ndaj Lazar Dejanoviqit më 15 tetor 2024.
Rreth 90 pjesëtarë të KFOR-it u lënduan gjatë protestave të dhunshme që ishin organizuar nga serbët, në komunën e Zvecanit gjatë muaji maj të vitit të kaluar, e që kundërshtonin futjen në objekte të kryetarë shqiptarë në komunat veriore të Kosovës.
Gjykata në Prishtinë ka dënuar edhe dy serbë të tjerë me nga 6 muaj burgim, për protestat në Zveçan.