Ministri i Punëve të Brendshme, Xhelal Sveçla, sot ka shkuar për kafe në Mitrovicë të Veriut.
Sveçla tha se është një vizitë e zakonshme kur u pyet nga gazetarët për arsyet e kësaj vizite.
“Kam ardhur për të pirë kafe. Vizitë e zakonshme. Ju ftoj edhe juve me pi kafe”, iu drejtua ai gazetarëve.
Sveçla u pyet edhe rreth pranisë së forcave policore aty.
“Pyetni policinë. Është detyrë e policisë, ata po i kryejnë detyrat e veta si është më së miri që munden, në kapacitetet e tyre”, ka theksuar Sveçla.
Ministri Sveçla gjatë kësaj vizite ishte i shoqëruar edhe nga ministri i Administrimit të Pushtetit Lokal, Elbert Krasniqi dhe zëvendësdrejtori i policisë për rajonin e veriut, Veton Elshani.
Ndryshe, para disa ditësh është sulmuar pastiçeria “Sharr” në Mitrovicë të Veriut me koktej molotovi, pak ditë pasi në të cilën qëndroi për vizitë, ministri i Punëve të Brendshme të Kosovës, Xhelal Sveçla, së bashku me ish-kryetarin e Mitrovicës së Jugut, Agim Bahtiri.