Shefi i grupit parlamentar të PDK-së, Abelard Tahiri, ka kërkuar nga Kuvendi i Kosovës dhe Qeveria shkarkimin e bordit të Zyrës së Rregullatorit të Energjisë (ZRRE).
Sipas tij, vendimi i ZRRE-së për ngritjen e çmimit të tarifave për energji i ka dëmtuar më shumë se 400 familje, të cilat sipas tij, kanë paguar tarifat me çmim më të lartë se sa është dashur.
“Vendimi i parë i Gjykatës Themelore që nuk u zbatua nga ZRRE-ja nuk duhet të kalojë në heshtje. Është vepër pënale që ka dëmtuar interesin e qytetarëve. Kjo cështje duhet të hetohet nga Prokuroria. Vendimi për shtrenjtim nuk do të zbatohet dhe do të kthehen tarifat e vjetra të energjisë. Duhet të shkarkohet bordi i ZRRE-së. Këtë ta kërkojmë përmes një rezolute në Kuvend”, ka deklaruar Tahiri.
Më herët gjatë ditës, kishte reaguar edhe kryetari i PDK-së, Memli Krasniqi, i cili ka thënë se pret nga gjykata një vendim i cili do të mundësonte që t’u kthehen mjetet qytetarëve të cilët kanë paguar tarifat me çmim më të lartë se sa është paraparë me ligj.
Gjykata e Apelit, e ka vërtetuar vendimin e Gjykatës Themelore në Prishtinë, me të cilin kishte pezulluar vendimin e Zyrës së Rregullatorit të Energjisë (ZRrE) për tarifat e reja të energjisë elektrike.
Apeli ka refuzuar si të pabazuar ankesën nga ZRrE-ja, kjo është bërë e ditur në njoftim të Apelit, të mërkurën.
Gjykata e Apelit refuzon ankesën e ZRrE-së për shtrenjtimin e rrymës