Pa marrëveshje, por me shpresë se mund të arrihet një e tillë, ka përfunduar takimi i së enjtes mes kryeministrit të Kosovës, Albin Kurti dhe Presidentit të Serbisë, Aleksandar Vuqiq në Bruksel.
Megjithatë, pas takimit, përfaqësuesi i lartë i Bashkimit Evropian, Joseph Borrell theksoi se ky nuk është fundi i tregimit.
Palët, tha ai janë pajtuar që të takohen përsëri.
Përveç BE-së, dialogun me vëmendje po e përcjellin edhe Shtetet e Bashkuara të Amerikës.
Këtë e konfirmoi gjatë së enjtes zëdhënësi i Departamentit të Amerikan të Shtetit, Ned Price.
“Ambasadori ynë në Bashkimin Evropian, Ambasadori Gitenstein, është një prej zyrtarëve që po e shikon këtë çështje nga afër, por ka edhe të tjerë zyrtarë të lartë gjithashtu. E di që kjo është një temë për të cilën vet Sekretari Blinken, ka ndarë kohë të konsiderueshme. Pra, ky është një prioritet, për përfaqësuesit tanë në terren por edhe këtu në shtëpi”, ka thënë Price.
Një temë e cila është duke u shtruar vazhdimisht në tryezën e diskutimit nga Serbia, është Asociacioni i Komunave me Shumicë Serbe.
Për këtë çështje, publicisti Shkëlzen Maliqi vlerëson se Kosova duhet ta dorëzojë një propozim.
“Unë mendoj se pala kosovare duhet ta përgatitë vet një propozim, duke i respektu kufizimet që i ka dhënë Gjykata Kushtetuese, që ata ta kenë njëfar Asociacioni por pa ingerenca të mëdhaja autonome. Aty këtu ndoshta mund të bëhet ndonjë lëshim i vogël, nëse nuk do të hyja në spekulime, por jo ata të bëjnë shtet brenda shtetit”, ka theksuar Maliqi.
E, në takimet e nivelit të lartë, profesori Seb Bytyçi pret që të vazhdohet të diskutohet edhe për marrëveshjen gjithpërfshirëse.
“Në përgjithësi mendoj se ishte një takim i mirë për shkak se siç thashë po flitet dhe është në agjendë marrëveshja gjithpërfshirëse, e që është në favor të Kosovës dhe ka një pajtim për agjendën e ardhshme të takimeve të nicelit të lartë, pra që nënkupton se gjasat për të punuar drejt një marrëveshje gjithpërfshirëse janë më të mëdha”, është shprehur Bytyqi.
Një takim mes tyre, Kurti e Vuçiq pritet ta kenë edhe para 1 shtatorit, kur pritet të rikthehet në fuqi reciprociteti për targa dhe dokumente, i cili u shty natën e 31 korrikut.