Të paktën 34 persona kanë humbur jetën në Shtetet e Bashkuara pasi tornadot shkatërruese goditën disa shtete juglindore, duke rrafshuar shtëpi, rrëzuar linja të energjisë dhe përmbysur automjete.
Vetëm në Misuri janë raportuar 12 viktima. Guvernatori i shtetit, Mike Kehoe, deklaroi se tornadot kanë shkaktuar dëme të mëdha, duke shkatërruar shtëpi dhe lënë pas viktima. Autoritetet raportojnë se 19 tornado kanë goditur 25 qarqe deri më tani.
Në Kansas, të paktën tetë persona humbën jetën pasi një stuhi pluhuri shkaktoi një aksident masiv me mbi 55 automjete.
Moti ekstrem ka shkaktuar ndërprerje të mëdha të energjisë elektrike në shtatë shtete, përfshirë Michigan, Misuri dhe Illinois.
Në Misisipi janë konfirmuar gjashtë viktima, ndërsa guvernatorja e Arkansasit, Sarah Huckabee Sanders, ka shpallur gjendjen e jashtëzakonshme pas raportimit të tre viktimave dhe 29 të plagosurve. Viktima janë raportuar gjithashtu në Gjeorgji, Oklahoma dhe Teksas.
Shërbimi Kombëtar i Motit (NWS) ka lëshuar paralajmërime për tornado dhe përmbytje në Luizianë, Gjeorgji, Tenesi, Florida, Alabama dhe Arkansas, duke e cilësuar situatën si “veçanërisht të rrezikshme”. Sipas meteorologëve, erërat kanë arritur shpejtësinë deri në 97 km/h në disa zona.
Stuhitë kanë shkaktuar mbi 100 zjarre në disa shtete qendrore, duke djegur mijëra hektarë tokë. Në Oklahoma, zjarri “840 Road” ka shkrumbuar mbi 27,500 hektarë dhe mbetet jashtë kontrollit.
Shumica e shteteve të goditura ndodhen në të ashtuquajturën “Tornado Alley”, zonë e njohur për kushtet e favorshme për formimin e tornadove. Sezoni më i rrezikshëm është nga maji deri në qershor, por ekspertët paralajmërojnë se tornadot mund të ndodhin në çdo kohë të vitit.
Autoritetet vazhdojnë kërkimet dhe ndihmat për zonat e prekura, ndërsa parashikimet paralajmërojnë për përkeqësim të mëtejshëm të motit./BBC