Policia e Kosovës ka njoftuar se është dërguar në mbajtje një person i cili dyshohet se ka tentuar ta vrasë një person tjetër. Ngjarja sipas policisë ka ndodhur më datën gjashtë gusht të vitit 2022, kurse është raportuar më 27 tetor të po këtij viti.
“Në lidhje me rastin është raportuar se më 27.10.2022 është arrestuar i dyshuari mashkull kosovar dhe i njëjti pas intervistimit me vendim të prokurorit është dërguar në mbajtje”, thuhet në njoftim.
Ndërkaq, një rast tjetër i cilësuar nga Policia e Kosovës si “shkaktim i rrezikut të përgjithshëm”, ka ndodhur në komunën e Vushtrrisë.
Një person ka raportuar se disa persona të panjohur kanë shtënë me armë zjarri në drejtim të shtëpisë së tij.
Policia pastaj ka dalë në vendin e ngjarjes dhe i ka gjetur dy gëzhoja të armës AK-47, derisa kanë bërë të ditur se nuk ka të lënduar.
“Ankuesi mashkull kosovar ka raportuar se persona të panjohur kanë shtënë me armë zjarri në drejtim të shtëpisë së tij. Në vendin e ngjarjes janë gjetur dhe konfiskuar dy gëzhoja të AK-47, nuk raportohet për të lënduar”, thuhet në raportin e policisë.