Presidenti i SHBA-së, Donald Trump, ka shprehur zemërimin e tij ndaj presidentit të Rusisë, Vladimir Putin, për vënien në dyshim të besueshmërisë së liderit ukrainas, Volodymyr Zelensky.
Në një intervistë për “NBC”, Trump deklaroi se nëse nuk arrihet një marrëveshje me Rusinë për t’i dhënë fund luftës në Ukrainë, dhe nëse ai e konsideron Moskën fajtore për dështimin e negociatave, atëherë do të vendosë tarifa shtesë për naftën ruse.
“Nëse ju blini naftë nga Rusia, nuk do të mund të bëni biznes në SHBA. Do të ketë një tarifë prej 25 deri në 50 për qind për të gjithë naftën që del nga Rusia”, tha Trump.
Ai gjithashtu bëri të ditur se javën e ardhshme do të zhvillojë një bisedë me Putinin. Sipas tij, deklaratat e fundit të presidentit rus për një lidership të ri në Ukrainë mund të vonojnë arritjen e një marrëveshjeje paqeje.
“Kur Putini fillon të vërë në dyshim besueshmërinë e Zelenskyt, atëherë kjo po shkon në një drejtim të gabuar. Isha shumë i zemëruar kur ai e tha këtë”, tha Trump.
Në të njëjtën intervistë, Trump paralajmëroi masa të ashpra edhe ndaj Iranit, duke thënë se nëse Teherani nuk arrin një marrëveshje për programin e tij bërthamor, SHBA-ja do të ndërmarrë veprime ushtarake.
“Nëse nuk arrihet një marrëveshje, do të ketë bombardime”, tha Trump, duke shtuar se do të vendosë edhe “tarifa dytësore” për Iranin.